韓國五天遊~~第5天(22/5)

好快又到左last day, 早餐係中式, 吃白粥, 饅頭等. 食左咁多日豐富既食物, 今日終於可以清下腸胃了. 然後我地就去左化妝品專門店等地方, d野其實唔平, 可能在hk買重平d. 不過就証實左, laneige既water sleeping plus唔係原裝韓國貨, 佢地話plus只會在hk同新加坡先會有得賣.

Last day另一個景點係到明成皇后新抱既阿爹住既地方, 古代既豪宅.

室內

 

祭祖既地方

 

民間結婚情景

 

室外

 

室外

然後我地就到左明洞, 大約好似有兩個鐘既時間比我地作最後衝刺. 我地行下行下, 到左差唔多夠鐘時, 我地落左一個地下商場, 原來呢個商場大部份都係d手工舖, 超正呀~~~~ 最衰我地唔夠時間啦. 有機會再到呢度一遊就好了(記得係明洞既隧道出口十二號. 再行前兩個隧道口).

集合後, 我地再去食埋中午飯就去仁川機場回港了. 今餐都係吃返中餐, 雖然間酒家睇落幾好, 但煮既食物就真係差左少少, 同佢地既佈置唔太襯.

韓國五天遊~~第4天(21/5)

第4天第一個節目就係到泡菜學校學整泡菜. 聽完由香港黎既Miss講解完後, 我地做既就係將d醃料搽落去一棵大白菜上, 再學埋點包好佢. 過程好似真係好簡單, 唔知o向屋企整會唔會都係咁易呢. 整完泡菜, 重有一樣係已經預先整好左既一舊甜品蓉, 我地只係將d料塞入去個木製模度, 再"鄧"佢出黎, Miss話呢款甜品係以前整比皇帝食的, 但味道就...... 

泡菜學校

整完泡菜及宮廷甜品後, 我地又玩變裝遊戲了. 換左衫後, 我地覺得唔多滿意, 因為同去大長今拍攝場地著o個d差唔多咁, 跟住行出黎時見到有排衫在旁邊. 就即刻除晒自己身上面d, 極速咁搵件靚少少既, 因為時間關係, 搵到件黃澄澄既著. 都好過冇啦. 阿嬸見到我地重以為我地剛過黎選衫tim. 呵呵呵~~

又到午餐時間, 今餐係餃子火鍋. 餃子味道都幾好, 但連我呢個咁遲鈍既人見到泡菜都開始有少少怕怕了. 好在第五日已經唔駛再吃韓餐了.

我地後來就o向青瓦台總統府對面既公園, 遠眺總統府, 之後就由後門入去國立民族博物館參觀了. 館內資料顯示全部都係韓文同埋英文, 所以我一路都係睇佢地既文物同模型. 佢地既模型整得好有心機, 好細緻. 所以睇得好開心, 因為知道卓對呢d都有興趣, 所以就更加比心機影多d相啦. (我係咪好抵錫呀? Baby~~)模型除左有以前既達宫貴人出遊外, 重有老百姓既生活, 喜慶活動, 技工工作情景, 民宅以及醃製泡菜既情景等. 重有可以睇到古代既皇帝皇后, 平民, 妃子及文武官既服裝等. 唔計其他古代既物件了. 因為冇乜時間細心睇>.<

 

古代既官出遊情景

 

皇后定妃子既服裝呢@@?

 

泡菜模型, 係咪幾可亂真呢?

 

其中一款泡菜模型

遊完博物館後, 就到我最期待既景福宮睇. 受明成皇后既影響, 不停咁找尋戲入面見過既景色, 我地行左交泰殿, 慶會樓及勤政殿. 當中最有感受就係見到慶會樓. 記得明成皇后抱住佢第三個剛剛死左既BB行到黎呢度, 懇求上天唔好帶走佢o個場真係好慘, 命運好似真係作弄佢咁.


 

只能遠眺的慶會樓

由勤政殿旁樓梯行上黎參觀殿內, 導遊話殿頂兩條金龍係朝鮮宣佈自己為獨立國時興建的, 意思係自己都係龍既化身, 皇帝之專. 原來勤政殿正中有人拍緊戲, 見佢搭左幾個台咁, 唔似係拍緊古裝片, 似係拍MV, 重要係勁舞o個隻. 哈哈~~

 

殿頂一對金龍

琪琪遙遠咁見到有位韓國婦女著住一套紫色既傳統服裝, 話好想同佢一齊影相, 我地就急急腳咁衝埋去, 好在冇嚇親佢. 哈哈~~佢除左同我地合照外, 重執住我地一隻手, 唔止nice. 重比我地有好親切好warm既感覺.

同埋勤政門前既衞兵影相後(導遊話佢地真係軍人黎的), 我地下個景點就係遊南大門了, 之後就係去樂天世界玩啦. 但我地後來決定左唔去, 繼續遊南大門, 其實格過價, 香港d野now重平過韓國的, 但始終咁遠黎到點到買返少少野先安樂. 呵呵~~ 呢度同旺角差唔多一樣咁多人, 我地係咁行呀行. 足足行到半夜十二點幾, 但d舖頭都係未close的, 而仍然都係咁多人shopping緊. 好勁呀~~原來比旺角更勁! 唔怪得韓國繁榮得咁緊要了, 呢個應該係其中一個原因吧.

韓國五天遊~~第3天(20/5)

第三日一早做左d咩呢...已經唔記得左了. 可能一路都係搭緊車去緊夢幻世界. 入左夢幻世界範圍內, 我地首先就去食韓式黑豬肉火鍋, d肉腌得好入味. 但比較膩, 好易就飽了

黑豬肉賣相很像牛肉

 

 

到左夢幻世界後, 工作人員個個都會同我地揮手打招呼, 令人感覺很佢地好熱情好似真係去左夢幻世界咁. 而我地首先搭纜車, 原本導遊話已經book左快証諗住唔多人就等我地去左睇野生動物先. 但因為當日係星期六d人都係放假的, 已經好多人排緊隊, 所以我地就要暫時自由活動到三點幾時再返黎排隊了.

呢日天氣實在好熱, 而所有地方都係咁多人. 我地行左陣花園&玫瑰園, 玫瑰園d花全部都好靚, 而品種亦有很多, 我地差唔多睇晒時. 就見到開始有巡遊表演了, 表演者向我地觀眾揮手, 而韓國人個個都好投入, 都會同佢地打返招呼, 所以感覺真係好似參加緊嘉年華會一樣.

 

所有建築物也很童話

巡遊花車全部也很色彩縯紛

差唔多夠鐘集合去睇野生動物園, 我地行返去時. 突然有d職員姐姐叫我地行埋一邊. 我地重以為係乜事啦. 原來係到一班小動物出黎巡遊. 除左有鸚鵡, 一群鴨鴨, 重有馬騮仔同埋小馬. 好鬼得意.  

一群鴨鴨跟住工作人員咁行. 好得意呀. 有d鴨鴨好似係曾經比佢地染過顏色.

睇完小動物巡遊後, 我地等左陣就可以入去搭旅遊車睇野生動物了. 原來除左出面已經排晒人, 入面重有好長好長既隊, 我只係記得我地起碼行左幾分鐘咁上下先上到旅遊車. 而排緊隊既人就眼光光睇住我地上車啦. 真係多得導遊咋, 果然經驗豐富!

入到去, 果然d獅子, 老虎全部都懶洋洋的, 重要係好似知你影佢咁, 望下你就即刻拎埋一面, 望住個入口. 激鬼死!  睇完獅子, 老虎, 遠眺長頸鹿&大笨象, 獅虎(一對獅子老虎既結晶品)及白老虎後. 我地就遇到大大隻既bear bear熊啦. 今次司機大佬就用樂天熊仔餅收買佢地. 其中一隻識得"請請". 好過癮. 然後好快我地就出左黎了, 好似十分鐘都唔夠呀. 如果要排成粒鐘先睇到的話, 真係......睇完動物後, 我地重有少少時間, 就去左反過山車了. 個人都係唔受得咁刺激既野, 反完心跳加速重有少少想嘔既感覺. 弊! 真係老啦>o<! 唔係! 應該係我係"腳踏實地"既人, 唔慣呢d野架. 呵呵呵~~~ = =""""無言.....

又到集合時間, 我地就加速咁行去集合. 途中見到有個小型動物園, 見到佢地係專放d小型動物既, 而其中有埋d BB仔睇. >.< 可惜無時間睇了. 其實, 夢幻世界真係要用成日時間先睇得晒反得晒的.

 

擰過黎啦~ 擰你個獅頭過黎啦~~

 

晚飯就係吃人參燉雞, 比埋麵你加落去食. 其實我完全吃唔到人參味. 找到一條參蘇囉. 
 

韓國五天遊~~第2天(19/5)

第二天的節目是自費乘纜車到山頂欣賞景色, 因為我地冇參予. 所以在渡假村酒店食完早餐後就o向酒店附近散步, 行左一陣開始落毛毛雨. 表姐就返酒店先, 而我地就繼續行, 沿住河道, 一路行到去一間小殿, 再行上去一遍花既山坡上就經哥爾夫球場回酒店. 周圍既地方好寧願, 好舒服. 如果再有多d時間行就好了.



河旁景色

 

如果有多d時間, 行埋上去呢d咁有特式既渡假屋度參觀就最好了

 

就係呢片有好多小花既山坡

 

殿旁的裝飾

大約到十一點, 我地就拎住行李起程去雪嶽山區. 途中我地o向戰蹟紀念碑影左一陣相, 原後就去吃石頭飯

 

好淡的石頭飯, 上次同堇食o個個石頭飯好味好多.

之後我地就去左雪嶽山國立公園, 睇住個地圖, 就覺得好多好靚既天然景, 但因為路程遙遠, 所以無緣一遊, 只係行左去睇統一大佛, 新興寺及寺內梵鐘.

到左韓華溫泉渡假村, 然後就係到韓華溫泉水上樂園玩, 室內就有個水上滑梯, 按摩池, 人造浪池等. 而室外就係各個特式溫泉. 滑梯幾長, 都幾刺激的. 室外既特式溫泉, 比較特別係情人浴池的, 有三個大木桶, 而水係藍色的. 我地每個都浸左一陣就轉去另一個. 入返室內後, 我地就玩多次滑梯, 突然Eric比個職員攔住左, 叫佢去磅重. 因為佢重左一kg所以都冇得玩, 哈哈~~ 真奇怪, 頭先又唔叫佢去磅既, 難道浸完出面既溫泉會肥左的? 我同琪琪最後去埋人造浪池度玩, 兩個傻婆咁攬住泳池既分隔繩扮八號風球飄流大海, 嘩哈哈~~~ 最衰夠時間走啦, 唔係就飄多陣先.

夜晚就自費去吃魚生餐, 除左食海膽, 下面既貝, 上桌時中間有火, 重有魚生同埋其他海鮮. 而驚死我地唔飽, 重有個火鍋o向隔離. 我牛x牡丹, 覺得d海鮮其實冇乜味, 下次都係唔好浪費.

 

 

韓國五天遊~~第1天(18/5)

17/5 夜晚10點於機場集合, 零晨約40分起飛, 到達韓國約需時4個鐘. 本來趁住呢幾個鐘爭取zzz的, 但剛開始訓著時又要食野, 飽飽地差唔多訓得著時, 已經到左目的地了.



浸溫泉的地方

出左境後, 我地就先去到旅行社"送"的海水溫泉浸溫泉, 韓國浸溫泉係唔比著泳衣的, 所以我地就諗住洗個白白就算, 但原來沖涼既地方係浸溫泉既地方隔離, 而且要行落一層經過一條長長既樓梯先到. 我地最後都係用"祝君早安"size既毛巾遮住前面後面就光脫脫咁衝左落去了, 除左細個時, 咁大個人都未試過打開個"8月15"走來走去. 醜死鬼~~~

洗完白白後, 我地就到左大長今既拍攝現塲參觀, 睇電視時覺得好大好有氣派既宮殿, 到現場睇時原來只係好細, 真係佩服攝影師啦. 跟完導遊簡單介紹完各個場景後, 有約1個鐘既時間比我地再自由參觀及影相. 我地就去左租大長今既戲服黎玩, 因為係第一批幫襯既人, 我地一著完衫, 就成支箭咁走左去其他地方影相(原來著住d衫唔可以去其他地方影的), 表姐選左套皇后衫, 有埋個好誇張既假髮髻, 載上頭真係好重的, 但好搗笑. 有d遊客見到我地既打扮就要同我地一齊影相, 變左人肉佈景板, 但好好反呀^O^!



後來先發覺影景只係影左一幅.

 

野菌火鍋

玩玩下, 好快就夠鐘了, 我地就去吃lunch啦, 去左一間民宅經營既小店度吃野菌火鍋, 清清地都幾好吃. 飽飽後我地就座左好似2 or 3 個鐘車程去我地第一晚住既渡假村酒店. 而途中我地於油站停左陣, 買左d特式小食~燒尤魚&紅豆餅. 紅豆餅熱騰騰外脆內軟, 好好味. 但尤魚就一般了. 到左酒店休息左2個鐘後, 我地就到酒店旁既愛廸生博物館, 原來好多now生活上既用品, 都有經過愛廸生發明or改良的. 厲害! 除左可以睇到好多古董外, 重可以一聽最古老既音樂盒.(應該唔算係盒似左鐘多d) 正!

 

酒店周圍的環境



滑雪場地

 

就係呢個音樂"盒"了

晚飯都係火鍋, 但今次既湯底較濃, 不過都好o岩我胃口(乜鬼都話好味=.=""). 重有紫菜送飯呀! 食左好多. 呵~~但夜d就開始喉嚨痛了.

晚餐韓式火鍋

韓國既天氣較香港涼, 黎到鄉郊地方空氣又清新, 感覺好似上次去加拿大咁, 令人好舒服. 我地飯後散左一陣步就返房休息了, 其實大家都累了, 因為唔夠訓嘛~~

 

 

又有收鑊^^

因為mother唔記得左話我知要去茶會, 所以今日要去多轉旅行社. 搗掂好晒d野之後, 就以快步咁行下沙田, 行下行下咁去到西田, 見到有Peter Rabbit既Promo, 好多野都好靚, 但都好貴. 所以就得個"睇"字了. 正當以為好似無乜收鑊之際, 行左去平時唔會行去既文具部, 嘩~~~~~ 有動物file喎. 即時睇下有冇兔仔份先, 呵呵~~~~~



又有收鑊了!

旺角行街街

今日同堇一齊去旺角行街街, 好耐都冇出過旺角了. 天氣咁熱再加上咁多人, 真係好鬼累. 唔知係咪因為自己肥左既關係, 行左好耐都睇唔中衫buy, 後來在旺角中心一間舖度見到有兔仔T恤. 都幾得意就buy左兩件了.

堇話佢最近抽過d昆虫扭蛋, 咁o岩行過七仔時又見到有就試下反下. 運氣居然唔太差, 中左呢隻紅蜻蜓呀^^! 後來就buy左之前睇中既波鞋, 希望唔好咁快整dirty佢啦.

 

重辛苦過返工=口="""

今日實在好充實, 好少咁"頻撲". 因為要盡快搗掂個快証, 所以今朝一早就出左門口(重早過返工), 九點四十五分就已經搗掂好走人(入境處位先生好鬼風趣咁話: 嘩! 韓國五天團, 不過冇我份, 哈哈哈~~). 因為姑媽要十二點幾之後先得閒, 所以我就由灣仔行去銅鑼灣. SOGO剛剛開門, 一口氣衝左上x樓, 睇左陣就buy左一盒新既re-ment野, 中左第十款既麥茶, 西瓜set, 而送既就中左大阪串燒set. 之後又衝埋落地庫超市, 睇下睇下忍唔住買左d熱氣零食>.< 塊面重未好唷! 起碼要等一排先擦得.  

o向三越睇左陣串珠書之後, 再搭巴士去左沙田, 又走左去書局度睇書. 郊野公園之友會出版既郊野情報-蝴蝶篇出左第二版, 今次係藍色封面的, 呵呵~~ 睇黎要入貨了. 搗掂完去旅行d尾數後, 就同姑媽一齊去左KFC隔離間餐廳度食野, 叫左一個牛仔骨飯同一個蟹肉天使麵. 天使麵都幾好味, 但牛仔骨飯就.....好騷呀, 我以為係D牛仔骨騷, 原來係佢用D芝士好騷. 臨尾頂唔順, 食唔晒. 再搗埋琪琪佢地既北京旅行同Eric既上海機票後, 就返去新港城還漫畫及剪頭髮了.

 賽馬會隔離間剪, 髮型師-Mike好有心機咁教我點整好個頭, 而且效果不錯. 呢間髮型屋每隔一段時間都會幫襯返, 而每位Stylist都係幾好的, 所以每次都只係叫佢介紹.  



之前成日o向圖書館借, 重要keep到佢唔比我續借先還. 哈哈哈~~~

明天又放假~

今日返工, 成朝早好似遊魂咁, 可能近來真係放得太多假了.

呵呵~ 上星期六先發現原來BNO六月就過期, 因為要辦快証預備十八號去旅行, 所以諗住明天請半day去搗搗佢. 點知老細話放夠一日啦, 咁明天又多日假了.

下幾個月都好似冇紅假喎, 我會唔會好難捱架.........

06佛誕假期

下午在第一城飲完茶後, 到了城門水塘行左一陣, 真係一陣的. 只係逗留了個多小時 , 但居然見到美麗既藍色蝴蝶, 可惜, 佢地實在飛得太快又唔定. 我一行近佢地就飛左去另一邊了, 所以只可以影到佢地既影.





城門水塘的一角

五日武夷山旅行

五日武夷山巴士團旅行

頭兩天一路都係座巴士->訓覺->落車殊殊->座巴士...= =""" 就係咁. 第一日晚本來都有機會夜遊鼓浪嶼, 但導遊居然話要每人比五十蚊既車費. 因為覺得佢收得太貴, 所以作罷.

到左第二日黃昏六點零鐘, 我地終於到達左武夷山. 但一去到就比當地導遊帶左去買茶葉...

第三日, 先去反飄流遊九曲溪, 感覺挺不錯. 再到武夷山宮景區. 後來由返回剛剛遊九曲溪時經過的其中兩曲, 左手面可望到玉女峰, 而右面就是大王峰. 當地導遊介紹話傳說係玉女峰有三仙女其中最細既仙女同武夷山既大王相愛, 因為仙凡有別, 所以就o向佢地之間加左d野分隔左佢地啦. 佢地中間舊石, 我聽唔到叫乜名.

九曲溪景色

食左午餐後, 我地就去左龍川大峽谷睇瀑布, 由入口開始: 迎賓橋&千層瀑->龍行九曲->翡翠谷&三叠瀑->洗心亭&觀音瀑->霧雨巷->蘭花谷->真龍潭&紅岩飛瀑, 其實一路重有好幾個景點的, 但時間關係, 我地就去到導遊話最有氣勢既紅岩飛瀑就回程了. 其實我覺得觀音瀑比紅岩更有氣勢, 觀音瀑前連風勢都大d, 而水花飛濺得好勁, 連相機鏡頭也沾了水花. 不過紅岩飛瀑前既潭就大d即係真龍潭啦^^, 睇返catalog, 重可以o向度划船仔唷.

重記得其中有段溪, 因水流衝擊得太大, 由溪底湧上黎既水泡什至係變成淺藍色的, 佢地話呢度既負離子應該係最勁的. 雖然我都唔知係咪負離子最勁, 但第一次可以o向山水度見到d氣泡係藍色的. 勁唷!

 

紅岩飛瀑

因為我地有個景點冇興趣, 所以第四日既活動係自由活動或土特產專門店, 而當地導遊居然帶左我地去到一個只係得一間舖既地方, 而且又係賣茶葉同菇= =. 大家當然係冇興趣buy啦, 因為之前已經到過賣茶葉既地方, 而且之前o個間d茶葉重要係靚d既. 去完所謂既專門店後, 居然帶返我地去酒店, 團友就開始嘈了. 簡直係明搵我地笨! 因為之前一晚, 導遊話自由活動時會車我地武夷山市中心行的, 但now居然車左我地返黎, 話昨晚冇咁講過喎! 重要我地等埋d團友返黎先可以食lunch, 足足要等成個鐘. 然後個導遊先話一陣比返半個鐘我地行喎, 上車落車都差唔多半個鐘啦, 大佬! 所以之後大家都話唔去, 唔係到時就冇得投訴. 哈!

食完lunch後, 我地又座左唔知幾多個鐘既車, 終於去到南昌了, 南昌市係一個繁榮既城市, 成條街都好鬼多人的(會唔會係因為明天係五一既關係呢@@"). 我地到左八一廣場, 原來係紀念八月一日武昌起義既廣場(我以為係商場呀>"<羞死人, 好在無出過聲@o@). 返酒店食完飯後(南昌果然係出名陶瓷既地方, d餐具真係靚d), 我地就去左按摩, 大家都以為南昌係專出按摩師傳既, 所以滿心期待, 點知........ 連我都覺得佢地係水皮到不得了= =相信成班都係學徒黎的@@. 未按前我地問導遊, 想要盲人按摩, 佢同我地講, 盲人放假喎(大陸入面會有咁既福利?). 之後問返d按摩妹妹仔, 佢地話佢地呢間係冇盲人按摩的. 哈哈! 居然講大話. 早知唔按摩, 行夜市好過啦>o<

 

八一紀念塔

Last day, 我地冇機會行過南昌市就又要離開了>.< 好想睇下南昌出產既陶瓷呀~~~Lunch我地去左一間頗有特色既地方食飯. 佢係又以前既大屋改成, 除左有d古董佈置外, 重有個小小既放古董野既箱, 而d菜色都幾有特色(last餐點都似樣d). 飽飽後, 就帶左我地去一個宋代起既城牆, 如果唔係咁趕時間, 相信可以慢慢欣賞下城牆周圍既風景的(點知原來好多團友都唔合作, 遲左好多先上車). 跟住就又係座左n咁多個鐘先到羅湖火車站, 返到屋企已經係十一點幾了.

 

宋朝時已建成的城門

其實知道係巴士團, 己經有左心理準備係座咁多個鐘先到目的地. 但去到原來每樣野都要係比錢先會有安排, 都算了. 但"食水"駛唔駛咁深呢. 因為我地總共分左三個團, 其中有d團友o向隔離團探聽過, 我地呢個團個導遊(武夷山導遊)係收貴左我地的. 收貴左, 當係比多少少貼士都算, 但駛唔駛吸我地咁盡, 到臨尾o個刻都要帶我地去o個個所謂土特產專門店度吸埋最後o個啖(跟本我地一個團友都冇買到野). 武夷山導遊"食水"深, 大陸導遊又缺乏經驗(好多時都唔記得交待清楚d時間同安排), 香港領隊不知所謂, 全程都好似"置身事外", 發緊夢咁(除左同另一團既領隊傾偈時). 重要話自己帶過新人, 好有經驗. 收服務費時, 重要話:歡迎你地投訴! 真係, 關x有呢d員工真係值得"光榮"

 

最開心係o向武夷山酒店食飯o個度有畫賣, 大家都覺得呢位畫家畫功不錯, 而且價錢相當便宜.