2006年8月30日 星期三

無事出街小破財

 
上網找森林家族粉紅兔既資料時, 無意中發現yahoo拍賣場居然有得bid. 實在太好了! 約了在油麻地地鐡站交收, 而自從上兩個月行過旺角之後, 就一路都冇去過了, 所以就順便行埋街街了.

粉紅兔兔臉上既"花紋"真係好似一塊花辮咁, 好得意. 哈哈哈~~~果然好似佢地既名Wild flower family. 而個盒都幾大下. 剛好可以放埋上次入會時既粉紅兔BB, 唔駛咁慘同另一隻逼埋一齊了.
 
 
之前等Re-ment出既cake set, 覺得差唔多全部都好靚, 同往時一樣諗住買全套, 但都係睇埋實物先再決定. 最後.... >.< oh~~真係買左了. 雖然有d配件同森林家族既比例唔係太配, 但都冇後悔買左呢set Re-ment, 因為真係幾靚. ^^

後來就去左旺中行, 因為時間關係, 都係行得比較急. 而前前後後買既野加加埋埋, 居然o向一晚就用左成六百大元. 嗚~~~~都係少出街為妙啦.

2006年8月25日 星期五

落雨天行街街

放工後去了旺角, 但因為雨實在落得太大了. 所以只係行左陣就上左去旺角新世紀廣場行. 見到上次去韓國時見過既一間店, now香港都開左了. 咁o岩搽面既野用晒, 就入去買左一支Sea Vegetable Emulsion. 希望真係o岩我用啦, 咁就唔駛又要左試右試了.

2006年8月22日 星期二

再見了~

今日是婆婆的出殯日, 朝早六點半起身, 七點半出門口. 去到附近食左早餐後, 就去靈堂. 因為重有好多金銀未摺, 而傳說話金銀唔摺的話就係散紙, 要摺左先至係金銀元寶的, 所以我地就快快手咁摺, 希望婆婆收到既係元寶. 而大約十一點度, 就開始埋最後既儀式, 入棺同埋見婆婆最後既一面.

之後就係一夥人去到火葬場, 當到最後一部份, 推婆婆既棺木入火爐時, 情緒突然係爆發出黎, 眼淚終於都忍唔住.  我一向對感覺都係比較遲鈍既關係, 一路我既心情雖有不捨, 但都未至於令我激動到喊出黎. 可能我今次真係感覺到與婆婆可能係永別了吧. 希望第時在另一個無憂無慮世界會再見到她吧.

 

回到婆婆家, 還要進行上位儀式, 見到祖先位上多了一幅先人相. 聽阿姨說原來約在前兩年, 婆婆將太公的相也找到出來安放了. 但我現在才發覺, 實在抱歉, 還未裝過香給太公. 但大師居然話, 應該請走佢地, 因為唔知第時既子孫會唔會拜... 係我自己的話, 我就會繼續囉. 唉, 不過睇怕舅父佢地都應該會聽大師話了.

之後問阿姨婆婆外家既事, 原來婆婆係有兄弟的, 而且一d都唔少, 阿姨話婆婆係唯一一個女, 而有六個or七個兄弟的, 但因為打仗既關係... 得返婆婆唯一一個. 聽到後, 心裏面真係好難過... 戰爭呢樣野真係好無情... 唯有諗返李姓既家族好在係一個非常大既族, 相信而家姓李既人入面, 係有婆婆個族既血既人生存以及繁衍落去的.

怕第時會忘記所以今日要記低佢... 

2006年8月19日 星期六

馬鞍山

與堇相約到郊外攝影, 其實已經計劃左好多個星期. 終於決定今日出去, 下午點九恒安麥記門口等, 買好食物及水後, 搭的士向馬鞍山山頂出發. 先發現路旁有大蜘蛛, 可能未食飯, 手有d震. 沿路繼續發現好多隻大"gg", 嘩! 好恐怖.



向住昂平方向出發, 經過最後一間屋, 一向都知道o個度好多狗. 但以往都係見佢地o向閘內吠. 點知今次居然有兩個"窿"比佢地可以走出黎. 而唯一既路居然因為昨晚既大雨而積左一大灘水. 我地睇左一陣, 見到可以通過既就係o向其中一個窿旁既"磚塊路". 唯有頂硬上啦, 一路驚住d狗會走出黎一路就要小心行... 好在平安"渡過".



呢隻蚱蜢既顏色好靚!



唔知咩蟲! 不過藍得幾靚!



呢隻蝴蝶吸食花蜜既姿態比我睇得好清楚. 可惜影唔到佢收返吸管既姿態.





之前漏左post 既小四腳蛇, 頭大大好趣緻@v@



呢隻蜻蜻停左o向我旁邊, 我成個彈起身佢都係唔郁的. 重好似望住鏡頭咁. 哈哈哈~~



行到去山溪, 因為有蜻蜓, 就停左o向度狂影左一陣, 決定o向度開餐. 之後繼續出發, 一路都見到好多蜘蛛, 其中一隻全隻係黑色, 旁邊就係頭先o個種. Oh! 太多了, 怕怕! 所以冇影到.




堇想影呢隻蜻蜓開翅既姿態, 但佢點搗佢, 佢都唔打開, 但又唔飛走, 企得好硬呀!



我地一口氣行到去向住昂平既分叉位度. 原來多左個亭同埋種左d樹, 休息左陣, 發覺好似太早, 就向住昂平方向再行一陣, 見到藍色及紅色蜻蜓. 再行前少少就見到隻黑白色蜻蜓, 堇話佢好似未影過呢種. 見到佢好開心, 重話一定要影到佢. 哈哈. 我地一路"捕"住等佢停, 但佢警覺性好似好鬼高咁, 等左好耐. ! 突然見佢o向一塊葉度休息. 今次佢居然郁都唔郁, 我行到去鬼死咁前, 佢都唔理我. 哈哈! 所以影到好鬼近. 噢! 如果我部係零微距就好了.




沿路既花花



藍色蜻蜓

初時唔比我地影, 跟住任我地影既蜻蜓.

我地再行左陣, 就返轉頭行去石船o向邊了. 唔知係咪因為多左d樹, 覺得好似行好耐先到咁, 重要行錯路呀. 終於到達, 已經好鬼累, 我地開埋第二餐, 座左陣, 如果今日再大風少少就好了. 唔知係咪附近有燕子巢呢, 見到有雙燕子一路o向附近盤旋. 咁...咪有燕窩囉!
 
計下時間, 都係時候回程了. 我地睇返頭先影蜻蜓既位置, 嘩! 佢地都係好似頭先咁郁都唔郁既. 哈哈哈! 好搗笑呀! 係咪蜻蜓習性黎架.
 
又要經過返頭先o個間屋, 我地又好似頭先咁行啦. 今次d狗居然衝出黎, 而頭先帶頭吠我地既狗乸, 居然想埋我地身. 好在上次去沙羅洞, 學識點樣應付佢地, 而堇都識"兇"佢地. 所以o個隻狗都唔敢再行埋黎, 而其他狗就原地不動了. 真係嚇鬼死呀!
 真係唔明d人養咁多狗做乜, 入面有金執咩! 係都唔好比個窿佢地出到黎呀, 點知佢會唔會有日真係會咬到人架.

原來重有半個鐘度就有村車. 我地就行去馬鞍山既有機農莊度買汽水, 噢~~~太舒服了. 再參觀左陣, o個度既負責人阿叔阿嬸都好友善, 阿嬸重幫我搵睇下有乜花可以比我影. 可惜now係佢地剛剛既收成期, 冇乜野影了.



唔知咩花



農莊內的小蜻蜓, 躲在牆邊. 是堇發現的. 果然是蜻蜓愛好者!

時間剛剛好我地等左陣, 就有村車了. 因為覺得自己太臭XD! 所以就回家了.



回家時, 路經公園看到的百合

2006年8月18日 星期五

日出&森林家族新成員

今朝終於見到日出了, 晨運左咁多日, 終於見到了.





霎下眼就出晒黎@_@

今日多左個森林家族既新成員, 就係~~~和服兔了. 因為佢個樣好得意(成粒栗子咁!), 而color又係我鍾恴的, 所以一早就想入貨了. 上次終於決定o向新港城買時, 居然賣晒. 好在卓昨天在sogo見到就買左了. hohoho 好在佢收留左隻貓貓, 咁我又可以慳返少少.





天時暑熱~~ 嘆返舊西瓜先!

明天本來約左堇去郊外"搵食", 但剛聽到天文台發出雷暴警告. 唔係呀化... 希望明天陽光普照啦!



2006年8月8日 星期二

風雨蘭

八月四日-放假一天, 約了媽的朋友一起到滿山紅飲茶, 因時間足裕, 所以慢慢步行去新港城. 途中繞路到聖約瑟小學旁的公園, 原來此公園種植了很多風雨蘭, 可惜昨天剛打風, 很多花開了也被風吹殘了不少.