2007年10月31日 星期三

日本自遊行前夕

細細個時已經想去日本呢個地方, 今年頭終於計劃一遊了. 等左十一月既來臨好耐,  終於等到31號, 明天(一號)零晨五點先出發. 但我昨晚唔知係咪因為已經開始興奮, 訓到三點幾就醒左. 輾轉反側間重諗如果自己中左六合彩頭或二奬, 就同埋屋企成家人一齊去, 買相機或點點點....咁 越諗越興奮, 終於成五點幾先訓得返呀~~~

***唔知遊完日本返黎, 個yahoo blog可以正常返未呢.

2007年10月14日 星期日

城門水塘

本來星期一已經打好左成篇城門水塘一天遊, 點知...成篇冇晒. 跟住重要叫我重新登記過個blog, 但隔一陣又冇事喎. 屋企部機居然連網誌都寫唔到, 相又Upload唔到. 就算我更新左flash player都唔得. 而家重要限住每個日誌只可post 20張相, 我真係比佢play到人都癲啦~~~
 
今次自己和堇兩人去城門水塘一遊, 但唔記得左check下去城門既小巴o向邊度搭, 好在地鐵有地圖指示個小巴站o向邊. 到左小巴站見到人龍長到要警察維持秩序, 先記起係因為就近重陽節, 所以好多人去附近祭祖, 所以我地等左陣就決定都係打的算了.



到左城門水塘我地就由遊客中心o個邊既方向開始行, 沿路都幾多人行的. 剛行到路旁見到有隻巴黎翠鳳蝶飛到小溪旁吸水, 我地即時set好晒機同埋慢動作行過去. 正當位置差唔多ok既時候, 就聽到遠處有人聲傳來. 我地唯有爭取時間啦, 結果只係影到隻鳳蝶既影咋.



行左陣路旁就有條小路, 原來係行去第一個有白千層林既淺灘, 天色唔多好, 有d白濛濛咁, 而且水唔太多, 不過影人又幾有懷舊感覺. 哈哈~~~



=口="" 影到黑炆炆

逗留左一陣就再行左去第二個淺灘, 呢度有好多石頭, 加上天色有d白濛濛反而令到我地覺得好似去左外國既郊外咁. 原來呢度重有好多蝴蝶活動, 品種就都係平時見到o個d. 但可能城門水塘太多遊人, 覺得呢度d蝴蝶警覺性重高過平時見o個d, (心理作用吧~~)所以都只係影到平時影到既.



行到落去石堆度覺得好似去左d魔法世界咁, 哈哈~~~



呢隻好快就影到, 重以為呢度d蝴蝶好易影, 點知...





藍色斑蝶呀~~~ 可惜我影極都影唔到佢張開翼既正面, 比佢玩到...



呢隻蝶好搗笑, 吸蜜吸到完全唔郁. 我地兩個行到好埋好埋, 如果佢攤開對翼比我地影埋就好了.



>o<呢種蝶又係只有影到咁...



=口=""" 影時完全睇唔到右手邊光得滯



得呢棵樹生晒菌@@



新出既菌類好似絲絨咁, 呢個係佢既底部





旺仔小饅頭^O^??



影時只係覺得佢企o向塊捲住既葉度幾得意, 睇返相原來咁多卵o向塊葉底度.



好得意的樹根@@




臨尾有意外收鑊就係呢隻蝶, 居然比我影左咁多張. hohoh~~~



唔知放張"椅"o向度做乜呢? 睇風景? 等蝴蝶? 哈哈~~~

又一條小路, 今次呢度重大過之前兩個. 又係影左陣相, 就行返原路了. 點知行行下又上斜又落斜, 行到我隻野咁索晒氣, 但我記得上次係一路都係行住平路沿住水塘行的. 後來到達主壩, check返旁邊既地圖先知原來我上次行o個條係衛奕信徑.