Boxing Week 收獲

一早吼住Michaels入面想買既野幾時會大減價, 可惜到Boxing Day個日仍然都係呢個價, 一年豪"一次"既心態, 一於買左佢比自己開心下啦. 係蝴蝶形狀既Stamp & Punch Pack, 入面有一個Punch Pack加三款印, 可以造到三款蝴蝶, 真係一分錢一分貨, 無悔買左佢.



原本行入Nine West只係睇下就算, 見到對紫色高踭鞋覺得幾靚, 又減價減成一半, 著落去又幾好睇, 所以就忍唔住買左了. 前面就簡單D, 而個鞋踭係"令"面的, 算有少少特別啦.

落雪啦~~

今年既第一場雪終於响星期日黎左啦! 不過呢日落得唔係太多, 希望今年佢都係少少地咁落下好啦, 唔好好似上年咁攪到大家都怕怕~~ 但星期一晚又話會再落十厘米既雪...



行人路加左白色地毯啦~~



望住馬路先有明顯既落雪痕跡



求其影下一堆雪啦~~~



响車入面望住一片片既雪花飄落車窗, 一刹那呈現既六角雪花, 真係好靚呀~~~

生日快樂!

因為老公呢兩晚都係成十二點先收工, 而我又晨咁早要返工, 唔可以等到咁夜. 所以唯有變左响星期五既半夜(星期六既零時)等佢返黎啦.

焦糖蘋果mousse蛋榚~~ 好好味呀! 都係呢間出既mousse蛋榚似返食開既個種(唔知點解好多似都係偏軟).

食下蛋榚慶生, 望佢之後事事順利啦~~

卡樂B軟殼蟹手巻味薯片

 

兩個字: 好味! 下次去Richmond再買多兩包先!

聖誕黎啦~

今日下晝去左公司既聖誕PARTY, 只得一句: D食物真係極之唔好食! 之後就山長水遠去左Coquitlam Centre行街街. 行到商場中間見到有好多毛毛公仔既聖誕鹿做裝飾, 可惜因為無拎到相機入黎, 唯有用手機影下啦~ 好多幅都手震左.

 

又到聖誕~~~













呢間店有好多好靚既聖誕裝飾賣, 而呢棵聖誕樹既佈置好特別, 所以忍唔住偷影左佢!

木馬(?)

哈哈哈~ 呢張相係上年既十六號影既, 足足一年啦, 呢年真係好少寫Blog.

 

呢晚去左一間食芝士餅既店, 係入黑先開門做生意, 越夜越旺. 而附近既店舖都係賣藝術品既, 呢間店就係賣傢俱&裝飾品, 呢隻馬馬係用一塊塊木整出黎既.

David Copperfield魔術表演

其實已經係上年十一月既事, 係邊日都已經唔記得左㖭啦, 不過唔寫返落BLOG, 日子久遠就真係會忘記左了.

响我未黎加拿大前老公已經訂左票, 原本打算同埋爸&媽一齊睇的, 可惜佢地既假期無咁長, 要返香港了. 所以就變左同佢朋友兩公婆&姑媽一齊响當晚睇表演了.

 

細細個已經鍾意睇佢既魔術, 而當晚既表演亦係好精彩. 入面經常出現一隻白雪雪既真鴨鴨, 好可愛. 令好多觀眾都留下深刻印象. 主辦單位真係識搵錢, 賣紀念品入面就出左鴨鴨既毛公仔了. 所以鴨鴨公仔係搶手貨之一, 而老公亦知道我心思思想買, 所以就...以下白雪雪軟綿綿既鴨鴨就係我地既紀念品了.

知子莫若母^^

 

星期二一返到屋企即刻手軟腳軟到企都企唔到, 以為係因為返工太累, 所以就即刻快快訓下覺, 個身凍冰冰但個頭又熱辣辣. 夜D飲左杯感冒沖劑焗左身汗終於退左燒, 第二朝繼續返工.

 

成個朝早手軟腳軟, 個肚又絞住絞住痛. 但又無廁所去, 終於都係決定早退, 去睇醫生. 去到醫生度再探熱, 原來都重有發燒, 佢話睇徵狀似流感. 只可以食白粥&焗住第二日唔可以返工啦. 返到屋企食左退燒藥&腸胃藥, 燒好快就退左. 但個肚仍然絞住痛, 今朝都重有少少, 希望快D好返啦, 要我介口真係好辛苦㗎.

 

打電話返香港問媽咪野, 突然間佢居然問我係咪唔舒服, 我重問佢係咪有人話比你聽㗎? 佢話無呀. 係咪有句: 知子莫若母. 阿媽真係勁!

KitKat 特別版

試食記錄: 分到的日本手信: 四種口味既KitKat. 白色(Lemon Vinegar)&藍色(波子汽水)係最好味, 黑色&紫色分別不大.

久違了的家庭樂~

前一日同大伯約好星期日與姑姐一齊去飲茶, 但原來姑姐唔得閒黎. 原本以為飲過茶後行一陣就會回家的, 但原來重有節目, 我地飲完茶後姑姐&兩位表妹就揸車黎接我地.

原來係去摘藍莓呀! 唔駛坐好耐車, 去到RICHMOND, 有條街有好多牌都寫住有藍莓摘. 表妹上星期已經黎玩過, 已經"格"過價, 所以唔駛再左選右擇, 即刻就泊好車, 每人一個膠袋就"開工"啦. 藍莓雖然重有好多, 但大粒既已經比人摘左好多, 所以我地都要响每棵藍莓樹度望高望低, 搵D大大粒既. 大伯重提議一陣大家將自己認為摘得最大粒既藍莓黎比賽, 奬品咖啡/珍珠奶茶一杯.

呢盤就係我今日既收獲啦~~

摘完藍莓, 我地就去一間叫筷子既店食晚飯. 以溫哥華黎講, 呢間店無論食物同招呼都極唔合格. 棒棒雞汁太多, 粉皮太淋. 生煎包可以煎唔脆的. 紅燒獅子頭&一個炒肉絲(唔記得左乜名)係超鹹. 重有係瑤柱蛋白炒飯, D飯實在係硬得太厲害. 而我地由開始食飯已經飲晒既茶, 到食完飯都可以無人主動黎加水的. 如果太忙可以理解, 但全店只得四/五張枱係有客, 有兩位侍應都可以忙成咁?

自己買同埋自己摘既分別-自己摘差不多粒粒都咁大粒!

因為姑姐想飲珍珠奶茶, 所以我地食飽後就過左隔離既圓香. 等左廿十分鐘, 都消化左頭先一餐少少啦. 為免飲完一杯後太飽, 叫返上次飲過既梅子緣茶加椰果, 另外大伯叫左個炸雞翼, 同樣都好好味. 飲完真係飽上加飽!

之後表妹提議不如去行夏日夜市, 今次入左專用既停車場, 一落車唔駛行好耐就可以睇野. 响呢度再睇右睇, 應該都行左一兩個鐘. 佢地買左好多DVD, 跟住就盡興而歸啦.

左: 有好多粒咁大㗎! 右: 成盤入面最大粒既一粒!

藍莓之王最後都唔知屬誰, 反正大家都有得飲!

雖然節目普通, 但返屋企時係開心既心情, 前一日既不快一掃而空, 已經好多個月未享受過呢種家庭樂既樂趣啦. 家庭對我黎講真係好重要, 係咪應該快D開始自己既家庭呢? 而家同老公只可以叫二人世界吧.

Sky Train-Canada Line Open Day

 

今日係Sky Train入面一條行車線叫Canada Line既開放日, 亦係任搭日. 我地首先响Broadway站既附近泊好車, 之後就行去車站排隊, 而車站已經排左一條好長既人龍. 好在排緊隊既時候有D宣傳單睇下, 而車站前又設左幾個檔比人拎紀念品, 隔一陣就派襟章, 隔一陣就派環保袋, 叫做唔駛齋排, 有D"細藝"咁啦.



襟章仔兩個



呢本Passport係比我地去Canada Line沿線既站度蓋印



呢個印係Broadway-City Hall Station

足足排左個幾鐘, 我地先可以上到車, 決定第二個去既站係機場. 逼到去機場都幾累下, 加上我著對唔適合既鞋, 所以就坐响度等老公去拎D Passport吸印仔. 見到好多人拎住一支支又綠又藍既雪條. 我地就走過去睇下有乜活動, 原來係冬奧既宣傳活動.



我想走埋去呀>.<





中間直個張-問左幾個姐姐都無, 好在最後個位有得比我拎咋.

三隻吉祥物同小朋友影相, 隔離就派雪條, 周圍重有D姐姐派下貼紙. 我當然去問姐姐拎貼紙啦, 收獲都幾豐富㗎. 收好D貼紙就座低食雪榚, 之後就出發去另一個站啦. 點知原來機場站都係好多人, 但感覺排得快過Broadway站, 可惜我地差唔多排到上車時先發現原來Passport 最後一頁有個Bonus Stamp, 問職員話個Bonus 印係响機場呢邊吸埋的. 無理由又行返過去㗎...所以我地今日既目標: Passport吸滿印就取消了.



機場站排隊時突然出現Canucks既吉祥物, 原來佢現場即場送親筆簽名比我地呀.





機場入面既圖黱



呢個係機場站既印

機場站

轉去Aberdeen站, 去完兩蚊日本貨店就返去Broadway站啦. 雖然今次呢條龍唔太長, 但反而要排好耐. 又排左超過半個鐘, 發現有d人好似可以直接行上車站上面咁, 我地當然即刻跟啦. 原來係去反方向的, 好在我地有跟上黎, 唔係就起碼要排多個鐘先可以返歸了.

地下反出彩虹, 手痕影低佢先.

排左成日, 好在都有d得意紀念品拎下^^".

夏夜夜市

今晚去左SUMMER NIGHT MARKET, 係每年既夏天都會舉辦既. 其實同年宵差唔多, 乾貨區賣既貨都係大同小異, 無乜特式的. 黎呢度最主要都係食野, 買少少, 買少少其實唔覺就食左好多錢了, 一年一次唔緊要啦.





特大咖喱味章魚丸.



終於到可以試到薯塔啦, 都幾好味呀.



綢魚燒~紅豆, 吉士&朱古力, 都係吉士好味!

另外重有食日式熱狗, 其實只係用左日式照燒醬代替茄汁, 唔太特別. 重有食得最多其實就係炭燒野~羊肉串, 雞膝, 豬頸肉, 魷魚, 雞翼. 原來羊肉燒左一D騷味都無, 而燒過既魷魚真係好香好味.

豬豬砧板

正當周圍睇買邊種砧時, 見到有三款得意動物砧板: 牛, 豬&雞. 貪得意所以就買左豬豬砧板了.



好唔好用都未知, 不過用時開心都好重要㗎.



另一邊既豬豬係咪好有"男人味"呢? 有條友話要分清邊一邊係底喎, 幫豬豬加左條粗眉.

綉球花

呢排係綉球花花開既時間, 綉球花最特別係一叢入面開既花可以有唔同顏色. 唔記得係聽人講定係睇書, 話用唔同既泥種, 可以令佢既花顏色都會唔同(變成偏紅或偏藍或偏白). 可惜今次無乜機會影, 只係响屋企附近影過一次咁多, 而呢棵就上面係藍藍紫紫, 下面就係深紫色(無影到>O<, 因為比D松葉遮得好緊要). 而佢都係我鍾意既花之一, 結婚時既花球其中一種花都係有綉球呢. 希望下年能夠影到更多顏色啦~~





藍中帶紫



紫中帶紅



白加藍

新鞋

一入鞋店就見到呢對鞋, 有三隻色, 灰&藍, 紫&黑重有一種係粉紅, 黑&灰. 覺得幾靚, 加上著上腳後雙腳有修長感覺, 而且又特價喎. 正當十五十六諗緊買唔買時, 出錢個位已經揸左主意, 所以就有新鞋著了.



另外兩隻色都唔錯㗎, 紫黑色個對令人感覺似ANNA SUI, 不過我怕成熟得滯, 所以始終都係要返藍色.

收到啦~收到啦~

收到啦~~ 收到啦~~ 收到堇寄黎既手工橡筋, 三隻扭蛋&充滿暖意既信. 條橡筋好靚呀, 同出面買個D一模一樣呀. 而隻錶&印仔真係好靚&CUTE呀. 好開心! 多謝你!



同出面買既無分別呀, 以後你可以整黎自己用啦^^.



好小朋友既電子錶, 大人就掛响袋度用啦. 紫色真係最靚呢, LUCKY~~

印仔唔知點解上官網搵唔到佢既資料, 我咪捨得貼D貼紙住, 唯有後補啦!

剪頭髮

下個星期被邀去做姐妹幫手(表姐既朋友), 因為自己又唔識化粧&SET頭, 雖然到時有人會幫我整, 但為免麻煩人地太多, 而且天氣又咁熱, 所以就將頭髮剪短啦. 爽! 爽! 爽! 好耐未試過D頭髮咁短啦~~~

今日重周圍去睇出租屋, 但打左好多個電話都係無人聽/留言. 其中有得睇既屋: 廳&房都太細, 房細到跟本擺唔到雙人床. 另一間就係幾靚既新屋, 可惜房租超出預算, 而且只安排你一個星期洗一次衫, 洗衣機又放响租主屋內.

正覺得今日可能唔係適合既日子, 諗住去埋最後一間後就去食晚飯. 點知入到屋就覺得房同廳既SIZE啱啱好, 而且浴室重好整潔. 洗衣機都係放响廳入面, 屋主知道我地無咁快搬入黎, 佢話會油過D牆更新. 周圍又夠靜, 而且同姑姐間屋都幾近, 交通又方便, 諗過覺得都OK, 所以就再同屋主落埋少少定金. 包租婆重好鬼好傾, 足足傾左成粒鐘再走人.

希望我地會順順利利搬入呢個小天地, 住得舒舒服服, 順心順境啦~~~

洋葱花

一棵放左上露台種既洋葱, 一路都無淋水, 無施肥, 居然都能夠長出花來. 原來洋葱花係咁靚, 而且花期都幾長下.