慢N拍

黎呢邊時第一樣要做既其中一件, 拖左咁多年, 今日終於完成左第一步啦! 我都知我好離譜㗎啦, 有時覺得自己做野咁無推動力呢個缺點真係要改㗎!

Rement-My Melody

响呢邊賣既Rement鬼死咁貴, 差不多係兩倍價錢, 為免自己得個睇字, 所以好耐都無睇過Rement出啲乜. 今次經堇堇度知道原來出左Set My Melody既, 即刻挑起左我條筋要據為己有啦, 未買到都寫返個Blog黎興奮下先.

自私的人II

剛睇左佢個FB近況留言, 好明顯就知道佢重係咁自以為是, 重未學識呢一次既教訓. 睇黎上天比佢呢一刀重未令佢自覺, 將來可能繼續重有更自以為是, 只顧自己既舉動.

自私的人I

各親戚都知道佢又巴閉又自以為是, 但因為生仔呢樣野真係搵命摶, 而且有時唔係每個人都識推個BB出黎, 以致要開刀. 所以都一再勸佢三思, 但當然佢仍然都係咁堅持要實行自己既NATURAL行動啦, 响屋企生. 陀住個BB時又一次都唔去照超聲波, 無人叫你照咁多次, 你可以照最主要既一次啫, 雖然父母係好健康既人, 但一般作為媽媽都多多少少會擔心自己個BB有無問題, 不過都好佩服佢自信成咁既. 但我覺得佢似為滿足自己實行既"自然生活"多啲, 唔係為BB既平安為首要.

原本佢搵既助產士幫佢計好係呢個月中分娩, 但响星期六下午就打電話話我知剛剛穿左羊水了, 然後就公告天下响FB度不停更新近況啦(真厲害! 生仔都不忘玩FB XD~~~).

到左第二朝早(三號), 打電話問佢哋既情況, 佢哋話而家痛得好密啦. 應該都差唔多啦. 就响黃昏時座左入去水池度預備生, 然後當然我哋就係等消息啦. 第二日再打去, BB重未出黎, 但知道頭已經入左產道, 應該係今晚啦啩, 重諗BB唔係諗住要响六四出黎吓嘛. 但仍然未有消息, 當阿妹打去問佢哋點解咁耐, 會唔會有機會去醫院時, 佢哋居然話: 我哋係Nature派, 係唔會去醫院比醫生PUSH個BB出黎既. 吓?????????????????????? 重來未聽過生仔唔駛用力, 重要講乜鬼Nature. 簡直係匪夷所思.

終於到左五號, 佢哋話而家決定去醫院, 但其實已經見到BB個頭, 咁應該生得了吧, 去到醫生話未生得, 但應該會响呢兩三日生, 咁就又返左屋企, 繼續佢哋既"自然生產"之路. 大家都覺得簡直係不可思議, 未聽過人哋可以咁樣生仔法, 而且個BB頭頂已經露左出黎, 重可以响屋企&醫院兩邊走來走去. 當然我哋呢D"一般見識"既親戚咪唯有繼續等消息囉.

到左五號晚, 佢哋原來已經又返去醫院. 原來係因為個媽既肚臍上面出現左D凹痕, 所以要返醫院, 醫生原本叫佢哋打催生針. 但BB既外公都頂唔順啦, 終於要求佢哋快D搗掂, 所以佢哋就決定開刀生.

BB終於响八點出世, 而家檢查一切正常. 但怕唔知會唔會有後遺症, 我哋當然唔希望有啦. 唉! 出世都咁難先出到黎, 唔知第時重要跟住佢娘既"自然之路"重要受啲乜(呢個人已經同我講過話第時唔會帶BB去打針喎, 經過呢次唔知佢重會唔會仍然係咁).

而家開刀生重衰過响醫院順產, 佢自己又受左一刀, 但到呢一刻佢哋仍然認為只係我哋太緊張, 其實佢哋覺得無野. 好自私, 完全只係諗住自己, 包括要個BB受埋你哋個套. 真係比人話怪獸家長, 我都開始有同感.

題外話, 原來一直而來佢都係將我以前同佢講過既野講返比當事人知, 難道講左佢自己會有乜著數? 想離間我哋之間既關係? 佢唔明白就算我哋大家呢一刻鬧交話好憎你, 我哋過後仍然都係會繼續互相關懷的, 佢一定唔會明白兄弟姐妹之間既微妙. 但我哋大家就知道佢係點既一個人了.

收到啦

望住呢個包果時, 上面既字跡令我有久違了既感覺, 充滿回憶&暖意. 哈哈~~ 收到啦. 多謝堇堇~~
早排响一蚊店買左塊粗糙既假草地, 諗住方便影野, 正好派上用場啦. 兔兔响草原休息~~



像真度好高呀, 可惜企响度嗰隻兔仔加左個扣.



另外重有衫衫, 又係好靚啊~~




 

2012的櫻花

完全無時間再整理自己既相, 何況係寫Blog呢, 而家每次有少少時間執相時先搵到之前打算Upload既相, 呢啲係今年影既櫻花.

雀仔一隻

行入商場時見到剛有隻雀仔飛過黎, 咁啱拎住部相機, 就影下佢啦. 唔知係乜雀仔呢, 有少少似麻雀仔咁, 但又好似大隻啲, 而且啲毛色又淡啲咁. 可能呢邊啲麻雀仔無香港啲咁好食好住.

意外收獲

因為將架車泊左响Sears對出既停車場, 所以走時就諗住經Sears可以直接D, 點知見到Lindt既攤位. 而且人又唔多, 又唔需要你買野就比你轉轉幸運輪. 見到咁梗係要試下自己既運氣啦. 蝦子餅轉到普通既朱古力兔兔一隻, 而我居然中左一個問號. 原來問號係佢會問你一個問題, 問題係Lindt响幾時成立呢. 正當我搵緊邊到有貼士時, 原來佢哋頂廚師帽已經寫左响度, 所以好輕易就答啱左啦(我重鬼死咁緊張叫埋蝦子餅幫手聽. 哈哈~~). 意外有朱古力食, 而且又有兔兔袋喎. 都幾Happy㗎.
 大奬係環保袋一個, 顏色簿一本&朱古力兔兩隻.





 

走來走去的一天

蝦子餅今日放假, 諗住一齊去野餐, 享受一下春天既到來. 原本諗住去返西溫個邊睇兔兔, 可惜入到西溫已經落大雨兼落雹, 所以我哋就唯有轉去另一地方, 點知D烏雲好似跟住我哋咁, 最後終於黎到Deer Lake. 食飽飽玩左一陣又見烏雲黎到, 所以就返屋企了.
阿B第一次玩韆鞦



玩到咁開心



因為太大風, 所以幫佢載返頂帽





打韆鞦後面就係湖, 兩隻鴿响度飲水, 話知你.

黑朱古力復活兔

去買復活蛋比小朋友, 見到呢個鐵盒, 所以又買埋復活節朱古力比自己. 可惜藍色盒係牛奶朱古力, 好在黑朱古力係紫色(起碼唔係紅色啦!), 都幾好.

甜品宵夜

蝦子餅帶回精緻甜品做宵夜, 短短時間被我一人消滅晒, 減肥修身計劃無限期延後... 的的式式既小杯Mousse甜品

春天黎啦!

呢期蝦子餅返晚班, 而因為今日有要事要到Richmond, 搗掂完之後食埋早餐, 然後重有少少時

間先返工, 所以決定又去兔仔公園(Minoru Park)度行下, 順便比阿B睇下真兔仔啦.

 

教堂前既樹叢一定會見到有兔兔的, 果然如此.

 

 

再行入D見到有兔BB行出黎伸緊懶腰.

 

 

縮返變雪球

 

 

大隻既一白一黑兔, 唔知係咪爸媽呢

 

兔BB又行出黎啦

 

 

又有另一隻淺啡色既兔兔走出黎

 

 

佢眼神好兇呀XD~~~

 

一隻唔驚人既鴨鴨, 個頭D羽毛响陽光下"另立立"

 

 

為食松鼠
 

 

 

櫻花樹開始開花啦

 

 

 

BB好有興趣, 一行埋去即刻一手就抓住, 而家越黎越快手啦.

再黎書仔

本來爸爸入Chapter買書, 變左BB買. 之後行Superstore又見到有本做緊特價. 所以一日內買左幾本.
 幾本都係兔仔, 又係佢個變態阿媽囉...哈哈~~ 趁住佢重未有意見嘛, 暫時梗係我話事啦. 嘩哈哈哈~~








 

2011情人節禮物

將近情人節時有個機會出一出去, 經過蝦子餅鍾意既朱古力店, 入去"係咁二"買左兩條白朱古力Bar, 等佢有小驚喜啦.
 都包裝得幾靚吧. 哈哈~~ 之後先發現有條買錯左唔係白朱古力㖭...

第一次去游水

今日帶阿B去左好多地方, 而最難忘既就一定係佢今日第一次去泳池遊水. 不過我哋天黑先去(其實只係五點零六點), 咁啱撞正游泳班, 變左阿B只可以响按摩池度玩.

佢一向都唔係大膽B, 所以都係一開始時驚驚地, 但好快就抗拒唔到玩水既魔力, 好快就變得好Enjoy啦. 笑到好開心, 見佢玩到咁開心, 我都想玩埋一份, 不過都係下次先啦:D 玩左一陣佢爸爸去左焗一焗桑拿&游左一陣水, 再返黎抱阿B落池, 但有個男人同佢講話而家水溫唔太適合BB(太熱), 所以我哋就起身返屋企了. 我諗下次都係帶阿B去游早水好D.



見佢咁開心, 就算辛苦D都值得既:)!