入新貨

BB已經有牙仔, 可以開始食糊仔&餅餅. 有機超市咁啱做緊特價, 所以蝦子餅入左少少貨. 呢個無聊既媽咪一於又紀錄一下BB呢個階段食過D乜啦.

有可愛動物做包裝既米糊



重有餅餅



有時出街或者唔夠時間煲粥仔既食既蔬菜什果




呢個季節無粟米賣, 又想BB試下美味既粟米, 所以之前買左呢樽
 

第一年既新年

BB第一年過既新年, 記得細個時媽咪會買對桔比我哋再加封利是放响床頭, 所以我都照做先.

團年飯

難得正常晚飯時間蝦子餅响屋企, 臨時臨急決定打邊爐, 順便當係食團年飯, 咁啱T&T賣龍蝦特價, 有口福了.



兩丁友食咁多野, 我唔"一日一日長大"就怪啦.



水滾啦~~ 開餐啦.



BB: 我食緊飯㗎, 點解擺隻咁怪既野上我張枱度既?


BB: 唔通食得既? 但點食㗎呢? 

發夢(哈~哈~哈~~)

起身餵完個仔食奶, 對張床仍然係戀戀不捨, 咁啱蝦子餅抱左個仔出廳, 就一於繼續瞓. 估唔到短短既半小時都可以發到夢, 重係好好笑既㖭.

夢入面係一個婚禮黎, 大家都座左响教堂入面等緊新娘子既出現, 原本都無乜野, 最特別既其實係周圍既賓客都係明星喎, 我望下望下, 記得對面(响面向聖壇時既右手邊)有劉嘉玲呀, 跟住座我個排(我座响左手邊既第三四行)既最左座左周星馳喎, 然後無幾耐有人走左入黎. 原來係劉德華呀(嘩哈哈哈~~~), 响夢入面佢見到星爺之後話好耐無見, 同佢傾下偈先, 咁就座左响度講左好耐野, 然後突然話叫我哋出去教堂出面食野先, 唔知有乜原因, 有D人就跟左出去, 有D人就奇怪緊做乜事啦. 咁我就繼續座响度望住D人响出面做乜啦.

最好笑既事情發生啦, 華仔座左响我隔離同我傾偈呀(嘩哈哈哈~~~), 重成個Sales咁款, 話我參加婚禮都唔戴首飾既, 然後就拎左幾樣野出黎(似唔似推銷先?XD~~), 其中有件係對耳環, 上面重有個心心㖭, 當佢問我呢個好唔好時...

蝦子餅推門入黎叫醒左我, 我重未瞓醒咁呆呆下, 然後就同佢講我發緊夢同劉德華傾緊偈呀. 講完之後自己先笑醒, 咁好笑既夢, 不妨寫落Blog第時笑返先.

哈哈哈~~~

BB第一次病

星期一帶BB去打完針, 唔知係咪已經開始比我傳染左感冒, 到左夜晚佢發燒. 即時拎返第一次打針時醫生比既藥出黎, 點知原來個支藥係比兩歲之後既BB食既, 因為之前阿B打左幾次針都無發燒, 所以都無留意. 好在姑姐已經放左工, 而表妹又响屋企, 佢哋幫我買左藥, BB食左一次就已經退燒.

可惜之後佢就開始咳啦, 雖然咳得唔密, 但癥狀就似我既感冒啦. 打針時比醫生檢查過, 當時醫生話唔建議比BB食藥, 而且當時佢又無乜事咁, 所以叫我返屋企比多D暖水佢飲就OK. 但衰豬就係唔肯飲水, 平時比佢飲都比下面你飲兩啖, 但而家連一啖都唔飲. 唔知係咪咁, 佢就嚴重左了, 有鼻水, 重咳多左. 本來想即刻約睇醫生, 點知打到去醫生放假...如果睇返女醫生, 我諗佢都唔會開藥比我. 而且衰豬又幾精神, 係變得唔鍾意瞓覺(人哋病要瞓覺, 佢就唔願瞓, 激死~), 希望我哋兩個都快D好返啦.

Michaels 大減價收獲

咳左幾日, 以為係燥熱所以先會咁, 點知昨天就開始作感冒, 阿B唔知係咪比我傳染左, 成晚扭計(又可能因為出緊牙), 好不容易瞓著點知半夜又嘈左幾次, 搗到無覺好瞓就開始喉嚨痛啦. 今朝帶阿B去打埋第二支六個月既針, 順便自己睇埋醫生. 醫生話我就真係病, 阿B就OK. 叫我比佢飲多D水(但衰B唔肯飲水, 以前都肯飲一兩啖, 但呢排更加難逼, 差唔多一啖都唔肯飲), 再加埋比佢瞓多啲.

之後就去左M記食早餐, 然後再去到蝦子餅返工附近, 佢返工, 我行街. 我第一時間就係行我最鍾意既手工店Michaels, 入到去見到好多野都做緊特價, 特別係聖誕裝飾, 二折. 所以我都買左幾個透明波波, 第時再研究下點樣整. 行左一陣都無, 阿B眼瞓又未瞓得著, 開始發癲啦. 响Michaels入面狂喊, 點搗都唔肯瞓. 唯有快快"立"下眼, 走去比錢. 點知一行出店, 佢就收左聲, 激死!
 今日收獲都算幾多(重有一啲無影到):



只係$0.3, 可惜得返幾個字母(無J又無A>.<)



買定第時即刻拎黎整, 費事到時想買時無特價. 原價$2.49, 而家只係賣$0.49咋.



呢個籃原價$24.99而家只係$4.99. 都算幾靚呀.
跟住去左Whole Foods度睇下阿B食既野, 最後買左包蘋果, Brown Rice Baby Cereal&一支薑檸蜜比自己即時解渴. 可能因為傷風, 覺得呢支野都幾好飲.

新植物

今晚去麗晶廣場入貨時, 路經每次都會去睇既一間花店, 見到呢棵小植物, 五辮五辮一組生長咁好意, 所以買左. 老闆娘話每星期淋兩次水, 而且唔駛淋透, 都幾易種咁, 希望可以種到佢越黎越荗盛啦.

拎Passport

BB既Passport响星期三已經收到, 而我自己既Passport就响星期五一早走去DHL度拎, 而家我哋一家可以計劃去美國玩了, 希望爸爸快D有假放啦.

BB既新杯

BB到左學用杯杯黎飲水既階段, 睇過好多種, 無論款式或牌子都係諗住用返佢用緊既同一隻牌子, 而當中既款式都係呢款最好, 所以就決定買呢個杯杯啦.



 BB: 堇姨姨~~我個杯杯有蜻蜒㗎^^.

左頻右撲的一天

原本諗住响Blog度記錄BB生長既點滴, 點知懶開有條路, 變左有時有記有時記記下又漏左, 再加上好唔適應而家個新Blog, 所以而家好似越黎越無寫Blog了. 踏入2012, 比自己有個籍口重新黎過, 希望可以响今年做返呢個寫Blog既習慣啦.

今日蝦子餅放假, 因為要買BB既野, 所以去左好多地方, 由Downtown到北溫, 再北溫到Lougheed, 簡直好似遊車河咁. 可惜既係今日天公不造美, 成日落雨, 重係大雨. 可能係咁所以返到屋企我哋兩個都散晒, 蝦子餅話重累攰過返工. 哈哈~~

總算買到張High Chair比BB, 返屋企裝好之後比佢座. 見到佢座响張High Chair度咁開心, 都值得既.