1月20日鹿湖郊遊徑-路程

計劃去賞吊鐘花, 而今個星期日既天氣回暖, 所以就相約朝早十點半搭299到西貢. 到達後就去麥記門口搭小巴到西灣亭, 我地先入麥記買定lunch, 點知出到黎條人龍唔見左. 但又見到馬路前少少有架似私人屋苑既小巴, 行去小巴前面睇又冇任何指示, 以為小巴已經開出了. 好在司機大佬落車話返比我地聽架小巴就係去西灣亭的, 原來好多人都好似我地咁, 所以司機就上上落落左好多次, 到滿晒人就開車出發了.

西灣亭

 

車程都幾耐下(唔知係咪我地心急呢), 落車後我地影一影個西灣亭及睇一睇郊遊地圖就開始行程了. 因某d原因我地突然決定不如再睇多次地圖先再起行啦, 睇左先發現原來我地呢個起點並唔係鹿湖郊遊徑既起點. 哈哈哈~~~ 真係好似心血來潮咁, 我地行返轉頭, 大約三十幾步就見到有指示鹿湖的起點了.



呢度先係鹿湖郊遊徑既起點呀~~~





清晰指示

起行~~~

起點係...上樓梯. 一口氣行左上去後, 行左大約十零步就發現到我地見到既第一棵既吊鐘花了. 哈哈~~~實在太好了, 証明今次目的冇白廢到, 影完相後我地就繼續行, 好快就出現分叉路了, 好在堇一早預備定參考資料, 加上路標有鹿頭既標示, 我地就繼續行了.

第一個分叉路, 行左手邊先o岩呀~~~

終於見到山澗了

行左一陣後發現點解重未見到有溪澗呢, 繼續前行後終於見到山澗了, 我地座左一陣, 咁o岩見有途人經過就問下佢地鳴幽瀑既位置, 但佢地都話唔清楚. 堇就提議行去上遊睇睇, 行左一陣. 見到有幾個人在野餐, 原來我地已經到左鳴幽瀑了啦. 雖然冬天水量唔多, 但見到一個景點, 點都會開心既.

一於向上游一探先~~~





呢個就係冬天既鳴幽瀑啦~~~

食飽飽後, 繼續行程~~~

食埋lunch我地就繼續行程, 之後就係一路行一路行. 到左一個三叉路口分別係指示:赤徑, 鹿湖及西灣. 烏龍既我地以為眼前路程平坦既赤徑係我地既路線, 重滿心歡喜條路咁輕鬆tim, 但搗清楚後先知我地行返鹿湖條路先o岩. 嘩~~~ 全程至"和味"既路就係呢度開始了, 條路斜到唔知幾多度角, 我行到要用隻手抽起條褲黎行(哈哈~~ 我係咁冇儀態的), 每次上左十零級就要抖了, 抖左唔知幾多次後, 終於到左鹿湖既營地, 可惜唔記得影返幅相, 我地真係"壞鬼後生"了. 哈哈~~~ 

可唔可以行赤徑條路呀? 好似簡單d喎.



呢塊路標隔離就係鹿湖既露營地了



回望一下先

經過營地之後既路就平坦得多了, o向住鯽魚湖方向行, 今次既路就係不停咁落落落. 好快就到左我地今日既終點鯽魚湖了, 需時約三小時既行程, 我地就用多左半個鐘. 



落~落~落~落~~



小水壩



水壩前的路標



繼續行啦~~~



到啦到啦~~~

再行多15分鐘, 就到北潭路了~~~

睇返網上資料, 原來鹿湖重有好多靚瀑睇的, 下次要趁夏天計劃再遊先.