第二次見醫生

今日約左十二點見醫生, 同上次一樣, 首先見我地既係一位醫科學生, 而今次係一位女仔, 佢既廣東話比上次既學生流利, 而且比我既感覺好穩重, 將來應該係一位幾好既醫生. 佢話BB都係打約有一百五十幾既心跳, 係正常, 而家已經係第十六週, 下次十八週再去照超聲波.

醫生都係後來先入黎, 都係好似求求其其咁, 但都比上次好少少.

第一次做超聲波

今日約左六點半去照超聲波, 但要我兩個鐘頭前飲4杯水落肚, 我忍左1個鐘已經頂唔順, 去左廁所之後補返2杯水落肚, 之後忍到我"屎屎"下. 表妹陪我去到診所後直頭唔敢坐低, 雖然問過人要等幾耐, 佢話大約十幾分鐘, 但簡直渡日如年呀, 好似隨時爆咁~~~

入到去叫我坐上張椅度, 我差D連座上去都有困難, 好在訓低左好似好返D. 跟住醫生(或者唔應該叫醫生?)就吱左D Gel响我肚上面(人地又話凍凍地既, 但而家係暖暖地喎), 照左一輪, 佢話BB心跳係153下, 然後就叫我去放水啦, 但唔好放晒, 大約一個紙杯咁. 嘩~~~ 太好啦! 但急得滯, 一下子都唔可以鬆晒呢.

之後再照多次, 醫生話因為我今次第一次照, 所以佢睇得仔細D. 等既時候都幾緊張架, 終於佢Show比我地睇BB既情況啦. 首先指比我地睇佢既頭, 然後就心臟仔, 睇到郁下郁下咁, 跟住就係佢細細既手手腳腳啦. 而家真係好細好細呢. 當我地睇住佢時, 佢重郁左一下TIM, 現場睇真係好得意.

原來下次可以唔駛飲咁多水, 兩杯都OK啦. 表妹重幫我問左幾時可以知佢係男仔定女仔, 佢話要到20週先講得比我地知.

後來佢Print左兩幅圖比我地, 不過我諗齋睇相就無咁過癮啦, 哈哈.

右手邊係佢個頭仔黎, 然後見到佢既身&小腳

Scan左好似重濛左少少, 但可以見到佢既手仔腳仔

第一次檢查

家庭醫生個邊幫我地BOOK左今日去睇專科, 約左十一點, 等到十一點半都未叫我名入去, 蝦子餅要返學所以就唯有走先.

到左差唔多十一點四十五分先叫到我名入去候診室, 點知蝦子餅打黎話今日都係唔返學, 而家趕返黎, 睇得出佢都幾緊張, 哈哈. 等到差唔多到十二點先見到醫生. 重唔係醫生本人, 應該係一位實習醫生, 問左我既個人資料, 呢個時候蝦子餅都趕到, 之後就實習醫生幫我聽BB心跳, 佢話有155下. 好在佢都好好人&斯斯文文, 令我唔會太緊張. 後來終於見到醫生啦, 覺得佢好似好趕時間咁, 企响門口問我地有無問題問佢, 點解呢邊D婦科醫生個個都係咁既? 好在重記得要問D乜, 但比我既感覺就唔係幾好啦, 家庭醫生又話佢幾好既.... 希望下個月見佢時好返少少啦.

出去有另一位女士幫我地約下次見面時間&去第二度做其他檢查, 原來我應該一早去驗血既, 好在當日即刻可以去, 重抽左好多支血呀~~~ 而照超聲波就約左下星期一, 好唔慣呢邊既睇醫生方式, 浪費時間呀~~~

照超聲波既時間就唔到蝦子餅, 佢唯有睇相啦.

頂唔順

昨天返工被安排做入箱既工作, 企足成朝, 終於頂唔順. 咁啱兩個台灣阿姐問起, 我就終於講左比佢地聽我有左啦.

佢地即刻勸我快D同佢地講, 等佢地再安排過我既工作. 講左比佢地聽之後, 佢地個個都戥我開心呢. 之後, 就轉左摺盒仔了.

但朝早勁得滯, 返到屋企條腰就好唔舒服了. 今日都重係有少少, 似係D骨Click住Click咁, 即係好似要用一用力伸一伸先舒服咁呢, 但又唔敢亂黎>.<. 今日已經座左成日架啦(摺左成日盒), 唔知明天又會安排做D乜呢.

作嘔?

早排同媽咪傾過電話, 佢問我而家有無開始有作嘔既現象. 到而家我都重未有想嘔既感覺, 但心口就成日突然好似悶住悶住咁, 唔通呢個其實就係作嘔既現象? 

另外有次返緊工時突然勁頭暈, 有次就係一朝早起身又係好似天旋地轉咁, 最衰重要等成個星期醫生先開始安排我去睇婦科啦, 等左好耐啦~~

始終未睇醫生唔想諗咁多野住, 又唔想比咁多人知住, 但個八掛公已經講埋比佢個Fd知啦. 唉~~ 佢話太興奮忍唔住喎!

Club House Japanese Restaurant

呢間食日本野既店, 環境幾好, 又唔太多人, 好適合約埋D三五知己黎一路飲一路傾. 而且價錢一D都唔貴, 所以寫返篇BLOG黎記錄返先.

牛油果露筍芝士壽司

 日式餃子



燒牛肉飯



雞肉鐵板煎餅



好好味呀~~

West Vancouver & 漁人碼頭

今日去左西溫山上面睇屋, 但屋比想像中細呢, 反而風景好優美.







見到獅門橋



之後就去左Richmond個邊既漁人碼頭. 最後就係去左夏夜夜市, 今年既小食攤檔比上年更多, 但太多人了, 所以都係要搵日再去"掃"檔啦.



一間羅馬尼亞既麵包小店









店內既人好親切呢



行過幾間舖頭, 發覺一間玩具店既櫥窗居然有森林家族賣呀~~



又行返去海邊~~

手信

黎左加拿大同屋企人相隔咁遠, 雖然細佬都响呢邊, 但因為住得遠, 所以都係平均隔個星期約出黎飲吓茶或食吓飯聚一聚. 除此以外, 重有姑姐&兩個表妹, 佢地好有心, 成日都掛住我, 令我可以經常都感受到溫暖.

表妹同朋友去左Osoyoos玩幾日, 佢重買左D手信返黎. 係Peach Syrup 重有大大既茄子, 蕃茄等.  



Peach Syrup 係咪酸酸甜甜既呢...



身邊無乜野可以用黎比較個茄子有幾大, 唯有搵兔B出馬啦~~



睇佢座得幾舒服^^~~

車

執下電腦入面D相, 有時出街見到D特別既車都有影低, 一於放埋落呢度先.



呢架超小型車係屋企附近既一間Pizza店既車, 慳Gas慳地方呢.





呢架就係有日响Superstore 停車場出面見到既, 隻顏色好靚呀.



而呢架就係某日去Downtown時見到既, 啱啱見到雜誌介紹話原來係餐廳老闆既古董車黎, 而家將佢改為舊式既美國的士, 話配合返佢地餐廳既形象喎, 每日停車費要成40蚊呀.

弄蝶

放工返屋企, 响門口見到有兩隻蝴蝶, 即刻入屋拎部機出黎, 可惜白色個隻已經飛走左, 好在重有一隻比我"過下癮", 好耐無影過蝶啦>.<~~~



吸蜜中~~

2010 Canada Day

七月一日係Canada Day, 今年去左Canada Place睇下. 唔知係咪過左冬奧, 今年既野無上年咁精彩, 好快就睇完返屋企了.





Canada Place 入面既裝飾









之後經過埋Stanley Park, 見返之前黎加拿大旅行時影過既大樹窿, 已經爛得好緊要了, 而且好似係話比人轉過地方.

我的LUNCH BOX-金菇炒蛋

上網睇下金菇可以點整, 見到有人教用黎炒蛋. 的確係簡單又好味㗎!

蝴蝶蘭

早兩個星期買的蝴蝶蘭, 影下相紀錄下先. 都重未Check下究竟點樣種, 希望能夠種到佢下次再開花啦>.<.









陽光下影得太Sharp, 蝴蝶蘭真係靚, 不過我鍾意白色有少少粉紅多D^^.

蘿蔔雕花

蝦子餅拎返黎屋企做既"功課"-蘿蔔雕花. 佢話放低左咁耐, 而家可以再練返, 而且重話雕花會令到佢心情舒暢.





第一朵-茶花



第二朵-玉蘭花



第三&第四朵-玫瑰 (還是月瑰呢?)





第五朵-菊花



最後一朵-都係玫瑰



令到我都好想整下手工㖭, 但係所有工具都重响香港呢>.<.