返工

今日除左係年初一新年外, 重係西方情人節. 所以今日公司有個特別OT, 返朝早五點. 上完頭炷香返屋企, 打埋長途電話返香港後, 我訓左大約一個多鐘覺就起身返工啦. 年初一重要開工, 真係... 再加上今日係我既LAST DAY(SEASONAL JOB), 真係...大吉利是. 唯有話自己家陣身在他鄉, 百無禁忌啦. 哈哈~~

今日返公司做既事就係將士多啤梨點上朱古力, 都好易做, 話咁快到左大約朝早九點就收工啦, 而阿頭就叫我地每人帶返少少朱古力返屋企. 返到屋企沖好涼, 上陣網就補返D覺, 訓下訓下, 等三點幾老公落場返黎就起左身, 到佢返工又訓返, 以為到夜晚我會訓唔著啦, 點知又可以照訓到第二朝. 總結年初一我做既事就係...訓覺. 都幾爽, 好耐無試過啦!



今年公司有兩款士多啤梨, 佢地話D士多啤梨比上兩年靚好多. 以上呢一款係細既, 沾上朱古力後再加上碎杏仁, 同埋碎杏仁榶(即是樂家杏仁糖入面粒心個種味), 都幾好味呀, 一D都唔酸(有人同我講話好酸). 重有另一款士多啤梨係勁大粒, 而頂上既葉好綠同埋重有莖既, 只係沾上朱古力, 睇落好新鮮好吸引, 如果可以影埋相就好啦.