馬鞍山

等左好多個星期, 今日終於係陽光充沛既日子, 所以當然係要行山啦. 由於我地成一點幾先出去, 所以就只係上去馬鞍山度行. 由燒烤場出發, 原本直接行去馬鞍山山頂. 但諗起好耐冇去睇過以前我地去游水既地方, 所以就去遊一遊先. 



記得以前游水既地方係成個水池咁既, 但而家就唔同了. 不過我記得好似係再行前d先係. 原本想再確認一下, 但最近成日落雨, 水位太高, 變左已經冇路可行. 所以等我得閒都係再行多次確認一下先.



呢隻蜻蜓警覺性太高, 所以只係影到正面.

行返上橋我地就由另一條路兜去馬鞍山山頂, 條路其實都幾斜, 但一d都唔辛苦. 可能因為係秋天既關係吧. 真係好鍾意而家呢d天氣>v<, 好想日日都可以去行山呀~~~ 因為知道呢條路係有好多人住既地方, 所以一路行一路都有少少驚. 好驚好似上次同堇行o個次咁突然成羣走出黎兇你o個種. 但一路咁行, 只係有幾家有養狗. 而亂吠既只有一家o者. 太好了! 呢度d人真係好. 唔會由得d狗亂咁黎.







呢隻蚱蜢真係靚, 睇下佢腳o個d花紋. 呵呵呵~~~

原來呢條路係通到去馬鞍山村車既總站, 休息左一陣. 我地就行返回程路了, 途中再試下行一行去另一條小路. 嘗試下搵唔搵到個礦洞入口, 沿路生左好多野菊花, 我地一路行, 前面既路比水浸到濕晒. 諗左一陣決定繼唔繼續前進, 終於都係決定繼續行, 搬左兩條樹枝同一舊石頭就行過去. 行左一分鐘都冇, 終於比我地發現左個礦洞入口啦. 耶~~~~多年心願終於達成. 冷靜一陣. 睇睇下個門口又唔多似, 因為平時睇d介紹書, 個入口係有一幅大牆遮住而有兩個窿o向牆腳的. 不過見門口既政府告示話呢度係礦洞入口, 可能每個入口都唔一樣吧.



唔知會唔會有機會一遊呢.

行返出黎時野菊既地方有好多蝴蝶&蜻蜓, 可能呢處比較靜吧. 所以佢地都聚集晒o向呢度. 嘗試下睇下影唔影到, 停左一陣, 終於見到有蝴蝶靜落黎, 即刻狂影. hahha~~~ 行返出黎時, 行左幾步又見到另一d品種. 正! 原來呢段路先係馬鞍山入面最多蝴蝶既. 而且都幾易影, 包括有車既馬路旁. 所以突然就多左好多"收獲"了. hohoho~~~



呢隻蝴蝶初時警覺性好高, 後來我縮埋跪o向地, 佢就好似當我唔存在咁了.



虫虫一隻



影左兩幅就要過相, 過相途中呢隻蝴蝶飛左落地, 我就嘗試用手放返佢落d花花度, 但佢即刻飛返落地. 乜蝴蝶唔係鍾意花架咩? 呢隻咁奇怪既.



影緊上面隻怪怪蝶時, 發現呢隻蝴蝶又係o向地上徘徊, 但佢好細隻. 我就嘗試用我部影唔到太細既相機影下.





 

之後一路都影度d蝴蝶雖然都係o個d品種, 但都好開心.



臨尾見到一棵花花, 都幾靚.