火車伯伯

自從呢個小朋友認得座小火車, 去親Metrotown商場十次有九次都會有埋呢個節目, 今日都唔例外.

今日都幾好彩, 我哋一行埋去排隊, 小火車就咁啱返到黎埋站. 呢個小朋友重好開心咁係咁同架小火車Say Hello. 今日呢位伯伯唔係之前個位, 睇落應該係亞洲人, 重友善啲. 佢一見樹熊就話佢同佢一樣係著住工人褲, 佢唔提起我都唔覺. 哈哈~~~ 座响小火車上面等開車時, 伯伯就過黎同樹熊玩, 呢個小朋友聽唔明做乜, 但笑容搭夠. 令到伯伯好鬼開心, 重話要同樹熊影相. 哈哈~~

分享

今日爸爸放假去左漁人碼頭, 爸爸話想食返上次表妹帶爸媽去食間餐廳. 我哋响碼頭行左一陣, 食完個好多人幫襯既炸魚(Granville Island好食好多, 唔明點解咁多人幫襯)就去餐廳食野.

呢間餐廳入面好多豬仔裝飾, 而餐廳標誌就係有翼既豬仔. 樹熊囝見到餐廳有啲膠豬仔, 就叫爸爸拎比佢玩. 到我哋食飽差唔多走時, 有個媽媽同埋小妹妹入左黎食野, 樹熊囝就話要比豬仔妹妹玩. 我哋同佢講, 叫佢一陣自已拎比妹妹啦.

到走時, 佢自已將自已玩過既一隻豬仔放返去原位. 我哋以為佢已經唔記得左話要比妹妹玩. 原來佢拎隻粉紅豬, 但行到埋人哋張枱又驚驚, 就咁放左响人哋張枱度就算. 哈哈~~~ 好在人哋媽媽明佢想點, 同佢講多謝同拜拜. 當時佢啲表情動作真係好得意.

成日整親

昨日樹熊整親膝頭, 今日帶佢去散步, 行路都可以跌親整, 又整損塊面. 唉! 雖然你係男仔, 但整花塊面都係唔好睇架嘛, 一歲時整親眼角條疤重响度, 上年萬聖節玩烟花又整到塊面花左少少. 唔通呢啲先叫男人味咩...唉~~~小心啲好唔好呀? 阿囝!

母親節禮物?

嘩! 母親節前一晚就收到禮物? 夜晚我哋座响廳度睇電視時, 俊俊見我瞓左响梳化就即刻同我講: 媽媽! 凍. 雖然我答佢話我唔凍. 但佢繼續走入房拎左張接好既被出黎, 重自已幫我攤開張被冚好. 

隔左一陣我就整左碗佢最鍾意既橙比佢自已座好食, 食左剩返少少佢又識話: 留比媽媽食.  

嘩! 冧上加冧, 何解今晚佢咁識做既呢, 哈哈~~ 真係又大個仔左, 提早送禮物比我嗎? 呵呵~~

老師幫佢印出黎既母親節禮物, 我都當正係佢送比我既第一份母親節禮物口架啦. 嘻嘻~~

 



 

叫Baby?

今日問樹熊囝, 妹妹(其實重未知囝囝定囡囡, 哈哈~~)英文名叫乜好. 其實我諗住睇下佢明唔明我講乜, 但佢好認真咁停左幾秒, 然後答我: Baby! 哈哈哈~~~~

究竟佢以為我問佢BB既英文係乜, 定真係想妹妹叫Baby呢. 如果係後者, 唔好啦啩...

開消防車

樹熊呢兩日同一個同學仔好鬼Friend. 但呢個小朋友都幾百厭, 而因為佢媽咪重要湊住佢細佬, 所以好多時都唔能夠制止佢啲百厭行為. 本來玩車車只可以响一個地方玩, 但佢哋可以玩到成個課室, 捐埋落枱底.

終於到老師唱遊時間前, 比老師吩咐要分開佢哋. 哈哈~~ 我就要樹熊座响我前面, 點知呢個小朋友叫我放開佢, 而佢媽咪都叫佢座好, 可惜佢都係叫唔住個囝, 依然甩繩馬騮咁. 好在樹熊後來都肯專心跟老師唱歌聽故仔.

之後就一路都無見過呢位媽媽帶住佢哋黎學校了(除左參觀消防局, 佢叫埋老公幫手睇囝).

到黃昏同樹熊出去散步, 去到消防局時. 有位消防員哥哥打開左消防車度閘清潔緊消防車, 樹熊行埋去佢度, 佢就同樹熊打招呼. 我同哥哥講呢個小朋友好鍾意消防車, 跟住佢就叫樹熊入去睇下消防車, 再抱左佢上去駕駛座.

不過, 可能太高又或者太突然, 樹熊居然驚驚地要落地. 之後哥哥又開著車頭既紅色燈比佢睇, 佢就响度傻笑. 然後我就同佢講叫佢同哥哥講多謝&拜拜啦.

呢度啲消防員真係好友善, 尤其對小朋友. 上次我哋經過時都有消防員送左貼紙比樹熊. 而去北溫時遇著消防員出動, 佢哋主動幫我哋响消防車前面影左張全家福, 又再送左貼紙比樹熊.