美國簽證面試

講左好耐話要搗既美國簽証終於今日約好左朝早八點三十分面試. 因為怕多人等, 變左老公夠鐘返工都未搗掂到時無人睇住阿B. 所以我哋晨咁早就要去排隊. 始終都係到時要interview既野, 硬係會令自己緊張. 前一晚都無乜點瞓過. 點知又係到將近要起身既時候鬧鐘就響啦. 五點四十五分起身, 六點搗掂自己. 阿B食完奶, 換完片&衫等就已經夠鐘出門口.

去到拎Visa樓下, 原來已經有人一早排緊隊, 個牌係七點三十分既. 嘩! 咁早既...但只見七點三十分&八點正既牌, 唔見我哋既時間. 唯有照排隊問清楚啦. 話七點三十分開始, 但都要等到五十分個女職員先走出黎開工, 好在佢話我哋八點半既都照比我哋入. 咁就將自己身上既有電子物品交比老公, 然後佢哋就响隔離㗎啡店等我啦.

一個一個入, 首先要拎住Passport. 然後入門口保安就叫你將身上面既物品全部放晒落佢哋個Tray度, 然後再除褸. 當佢"捽"完你件褸確保無任何野就叫你經過個金屬探測機, 你過左之後就比返Tray野你, 然後你放返好晒入袋之後, 交返個Tray比佢就可以上一樓啦.

上一樓經過三度門, 當中有三個高大威猛既保安. 然後就去到Reception, 交左楓葉卡&Passport比佢, 再確認相係近期影既(早知整張前幾年影㗎啦, 都唔Check既, 話晒以前都瘦D嘛. 哈哈:D), 佢再比個號碼你, 就可以座低啦. 等左一陣佢叫號碼, 交返楓葉卡&Passport比我, 然後就叫我上廿樓. 搭𨋢其間有一位保安跟住你, 真係"貼身保鏕", 覺得自己係重要人物呀. 嘩哈哈哈XD~~~

上到去又係等叫號碼, 今次係Scan手指紋, 然後再座低等叫名. 最後就係職員問例牌問題: 去美國做乜? 去邊度Shopping? 黎左加拿大幾耐? 有無屋企人响度? 佢哋係咪公民? 有無工作? 當答完唔駛一分鐘, 佢就話Approved左我啦. 三天後應會收到, 到時可以上DHL度查下, 然後就走得啦. 經過出口時見到有個牌寫住Cashier, 但自己應該比晒錢啦. 等𨋢時見到有個女保安(好似係之前入門口個位), 問佢又係例牌話唔知, 算啦. 應該無問題啦. 一落到𨋢就係樓下㗎啡店. 估唔到咁快就攪掂呢, 真好. 又係唔知自己咁緊張一輪做乜鬼. 哈哈~~

成日聽人講去美國既郊野公園睇風景, 終於我都可以計劃去玩下啦. 呵呵~~

因為咁早搗掂, 我哋就決定去中央圖書館座到老公夠鐘返工. 點知圖書倌成十點先開門, 所以我哋去左Tim Hortons食野. 同M記差唔多, 但比M記好食, 下次再食. 食飽飽去圖書館, 等左一分鐘就開門啦, 入到去Book左下午BB睇醫生. 然後就我搵書, 老公瞓陣. 到左差不多十一點我哋就搭Skytrain啦.

好在唔係繁忙時間, 好順利又唔逼人咁就到左醫生度. 醫生話阿B下巴個D係濕疹, 重話要同阿B沖完涼搽Cream, 話佢皮膚好乾. 天呀~~~~ 千祈唔好似我D皮膚呀~~~~~~~唔該你啦~~~~~~~醫生寫左張紙話藥膏比BB一日搽一次, 再比左支搽身既Sample我, 再幫BB磅左重, 而家有8.4公斤. 然後就走得啦.

搭車時打比朋友, 原來佢啱啱聽到我電話先起身, 真係唔好意思. 因為知佢餵人奶, 而佢又係同我一樣食同一隻牌子既維他命, 所以將之前預備餵人奶時食既維他命拎埋比佢. 到左站, 打電話比佢, 然來佢住得近個Skytrain站近得咁緊要. 上左佢屋企座左一陣, 佢個仔去左Daycare, 而囡囡就兩個多月. 嘩! 兩個多月既臉豬仔已經脹卜卜, 好羨慕呀. 即刻問佢湊B祕訣, 原來B女同阿B一樣出世時係七磅十一呢. 之後佢抱阿B, 話阿B其實都唔係好瘦, 而且肉實實淨的, 係臉仔瘦, 都算幾好啦. 而且佢話見阿B好多時都同我好有交流, 問我係咪成日同佢講野.

同阿B講話有個妹妹响度呀, 初時佢都見唔到. 之後我抱住阿B, 妹妹由媽咪抱住, 佢就睇到了, 即刻去摸人哋手仔喎. 但好快注意力又去左其他地方了. 之後就落街食野, 一路食一路傾, 然後就返屋企啦.

返到屋企散晒咁滯, 阿B搭車時瞓著左, 返到屋企即醒. 點都唔肯瞓返, 我散到座响度都瞓得著. 最後總算七點幾同佢一齊瞓著, 總算瞓左一粒鐘又要起身煲粥仔了.

好耐都未試過一日入面過得咁充實啦~~~~~~~~~~~~~~~~~~~~~~~~~~~~~~~~~~~~~~



响圖書館影返張相先:)

薑餅人

蝦子餅响公司拎返黎既薑餅人.







 

BB第一本故事書

細個時睇小鹿斑比已經好鍾意呢隻Thumper小兔, 之前行街成日都見到有佢既故事書, 但咁大個人買本BB書實在係... 而家終於有籍口買啦. 哈哈~~
 BB第一本書仔~~

荷包跌左

補返一篇生活事:

十二月三號約左表妹去屋企附近既社區中心, 話今日有個冬季手工展. 去到附近泊好車, 拎BB車出黎, 諗住唔會行好耐, 所以放低BB袋, 拎起荷包就行. 入到會場行左唔夠一分鐘, 諗住將荷包放返响安全既位置, 點知... 點解無左既????

即刻行返出去睇, 因為架車只係泊响對面馬路, 所以一出門口都可以睇清楚附近有無類似荷包咁既物體响地下. 可惜...無. 再搵下會唔會跌左响車度, 以及會場入面. 都係無既, 唯有帶住忐忑既心情去睇埋個手工展. 諗住响呢區跌的話, 拎返既機會都好渺茫啦. 最慘就係咁啱放左人哋既重要証件响荷包入面呀~~~

心入面重有個少少既希望, 諗住過多兩日睇下會唔會有人好心比返D証件我都好呀. 等左兩日, 都係無結果, 表妹放工幫我打左去差館報失, 開左File. 然後諗住第三日就開始要去補返D証件, 因為三十號要去辦美國簽証既面試.

真係希望在人間啦~~~ 到左第三日中午, 銀行打黎通知我話有人執到我荷包, 交左黎銀行, 通知我去拎返. 等到姑姐放工得閒車我去, 去到檢查下荷包. 嘩~~~ 以為自已既運氣衰到乜, 點知原來係相反. 荷包入面居然一蚊雞都無少到呀~~~~ 只係可能佢要睇我D野時調亂左D位置. 銀行職員話係後生女黎, 再問詳細D, 佢話當時自己太忙所以無問佢個人野(算啦~呢度D人係咁上下). 真係多謝呢位女士啦~~~

第一隻牙仔

呢排阿B吽緊出牙, 今日終於見到佢隻牙仔出現啦, 係下面左邊既牙肉見到白色點出現啦, 做個紀錄啦. 

 

影出黎唔太清楚^^"""

第一年的萬聖節

今年係BB既第一個萬聖節, 一早姑婆&表姨已經為佢準備左一件小蜜蜂既衫. 然後前幾日爸爸買左個南瓜返屋企, 再加埋工. 明天就等表姨放工帶佢去商場拎糖糖了.

試下件衫衫, 順便同南瓜影返張相先.



我鍾意傳統既款式, 爸爸熟手技工, 好快手就完成了.

轉尿片啦

前兩晚瞓到半夜都發現阿B既尿片漏尿, 今日終於要換到三號既尿片了. 打開黎睇, 尿片上面既公仔雖然都係芝麻街, 但已經唔係BB型了. 即係阿B而家已經係大BB了, 原來BB真係眨下眼就大, 有D唔捨得㖭. 所以影低左D尿片, 幾變態. 哈哈哈~~~



呢款三號尿片係阿B出世前買既, 而家已經出左新版, 得意好多:)

第一口米糊

星期一阿B去打第四個月既針, 醫生話阿B而家可以開始食米糊. 所以星期二就去買左盒米糊開始第二日餵佢.

醫生叫唔好開得太稀, 但睇盒上面既指示又開到勁稀咁, 所以就自己發揮. 阿B食第一 口既反應係縐眉, 但個口都有"嗒嗒"下, 個樣變到怪怪咁. 睇佢個樣就知道一定係好難食, 但佢都有將一匙米糊食晒.

第二日再餵, 今次整得無咁稀, 好似易入口D, 但個樣都係好明顯話你知好難食, 但佢都有好乖咁食晒咁滯. 見佢食到個樣咁, 我就食下味啦. 嘩...真係好難頂... 唔知係咪因為用奶奶黎開, 我覺得勁騷>O<. 之後我食緊蕉蕉時用匙括少少比佢食, 嘩~~個樣唔同晒, 一路食一路笑. 最後重要追問我要多D, 但又怕話蕉太甜, 所以無比多佢.

第三日, 今日只係食左一半咋. 等我明天試下用水開睇下OK唔OK先.

BB一百日

BB到左一百日啦, 唔記得左係當日還是之後既, 白水晶兔兔係蝦子餅買比BB一百日既禮物, 而咁啱我哋行水晶店時我又睇中一條藍水晶, 咁就變左係我既禮物啦^^.

兒科醫生

今日下午同阿B去睇兒科醫生, 可能天氣真係太熱, 衰B仔又係响巴士上面喊到好似比人謀殺緊咁, 真係訓練緊我既面皮呀. 比預期早到左, 响診所樓下餵埋佢先上去, 食左一半就唔食了, 唯有上去睇下點再食啦.

專睇兒科既醫生, 診所入面都係老米同老唐既公仔, 重有一箱箱玩具咁. 等左一陣就到我地啦, 醫生首先同阿B度身長&頭圍, 然後就檢查佢既腳仔, 皮膚&菇菇仔, 再去另一邊磅一磅重, 再檢查佢瞳孔. 然後再睇下佢腳仔&頸仔力度如何, 佢話阿B頸&腳都好夠力, 睇得出佢好有心機對BB, 而且唔會好似呢邊D醫生咁好似好有權威唔想你問佢野咁, 佢叫我過兩個星期後再去睇佢. 希望下次去睇佢時仍然都係咁好啦.

想嚇死爸媽咩

唔記得邊一晚, 衰豬仔又發難喳响張搖椅度又喊又伸直晒個身, 好似好唔想再座咁. 我諗佢可能無野挨住側邊, 諗住叫佢爸爸响房拎返個豆袋出黎比佢. 正當佢爸爸行到去佢前面時, 衰B成個人响張搖椅度反轉左頭响地落.嘩! 好在爸爸今次身手快接得住佢, 佢個頭先唔會撞落地, 唔係就.....

我地兩個比佢嚇到瞓唔著, 佢之後就無乜野, 真係比佢激死! 好野就唔識遺傳, 遺傳左你媽D臭脾氣, 唉! 呢個BB啲脾氣真係大到呢...

 

又係前幾日影既.
 

第三次打針

今日係阿Ｂ第三次去醫生度打針, 又係無磅重, "係咁二"問下阿B有無乜野就打針啦. 今次阿B比上次更叻, 一粒聲都無出到, 真乖! 不過可能係醫生手勢好, 哈哈! 前後五分鐘都無就走得啦. 真係要去睇兒科醫生先得, 唔係見佢打針打得幾好就真係以後都唔再去睇佢.

 

星期三去見婦科醫生介紹既兒科醫生, 希望呢個醫生幾好啦!



吹孖波? 幾高難度喎^^"""

BB第一次打針

今個星期四阿B就夠兩個月啦, 不過星期一佢爸爸放假, 所以就約左呢日去醫生度打針. 約左一點四十五分, 去到唔記得左換片, 姑娘提醒先走去廁所換. 之後就等醫生入黎候診室. 醫生响佢既屁股仔左邊打, 好快手就搗掂, 本身已經肚餓再加上比人拮左一野, 喊到鬼殺咁嘈, 快快手响電梯口度整返支奶奶塞住佢把口, 然後响地下大堂餵佢, 餵左一半就走人.

返到屋企幫佢探熱, 第二日再探多次, 好在無發燒啫.

前一日影既相

Jericho Park

一連兩篇唔開心既Blog, 拿拿聲寫返個開心既先.

今日係蝦子餅最後一日假期又係國慶日, 所以我地點都要出去行下啦. 首先去Canada Place湊下熱鬧, 影下相. 跟住醒起媽咪未試過日式熱狗, 即刻買响車上面食, 飽飽後就遊車河去UBC個邊海灘行下.
呢D木頭响呢邊既沙灘上面好普遍





彩色既風箏

去到Jericho Park幾熱鬧, 有好多人自備爐BBQ&野餐, 亦有好多人帶狗狗散步. 餵完BB食奶我地就响沙灘旁既路行下.

另一邊既天空

行左一段路, 有個小山坡. 有D小黑影响草地上面, 媽咪眼利, 佢話係兔仔黎架. 兩母女即刻行過去, 其實同走差唔多. 嘻嘻~~

藍天碧海青草地

首先見到既兩團小黑影

呢度D兔仔重多過Minoru Park, 有好多唔同既顏色, 重有好多BB兔. 而且睇得出佢地更加自在咁. 有D大D既兔仔重攤响度休息, 任你影佢. 哈哈~~ 又一個好去處啦.

原來樹叢旁有好多兔BB呀~~

呢隻灰白兔BB比較細膽



呢隻兔B同我好近



清潔時間



好Sweet~~



再行前D有兩隻兔B同兔仔既顏色一樣, 亦係我鍾意既顏色,好想帶佢地返屋企呀~~



大叫中: 好可愛呀~~~



之後就去左Richmond, 先去左Yaohan Centre入面超市行左一個鐘度, 然後就去每年夏天都有既夜市食野, 假日既一天好快又過左了.

 

請客

外婆同孫仔慶祝滿月, 同女, 女婿, 仔&新抱一齊食飯. 點菜時阿仔可能肉刺要阿媽或家姐比錢, 唔比個老婆點牛仔骨. 跟住個新抱居然响其中一個親戚(男家)講, 話餐飯Cheap喎.

奶奶已經講想食乜就叫啦, 而家係佢老公唔比佢order, 關乜人事. 點唔滿意都好, 都唔好咁白痴响男家親戚度講啦, 以前都唔覺個新抱係一個咁是非既人, 婚前點講自己會好著重家教, 但而家一D都唔似有囉! 

重有呀! 唔洗手玩BB都算啦, 重要擺隻手指落BB個咀唇度, 有無常識架?

奶奶

今日終於有奶奶啦, 個胸重谷到好漲. 下午試下比阿B食, 但佢可能已經習慣左食奶樽. 初時要試幾次先開始肯啜, 但唔知係佢牙力好得滯定還是佢懶. 剛好返既部份又損返... 點算好呀~~~~

唔通真係要比佢啜多幾次令到乳頭D皮硬D? 不過唔知係佢本身係男仔會大食D既關係(醫生話男仔係咁架啦~)還是係呢幾日食奶食大左佢個胃, 已經比佢食左成粒鐘人奶, 最後都係要再補奶先夠飽. 衰豬又係一食飽就可以好乖咁瞓覺, 而家已經瞓左成兩粒鐘都未醒.

第一次睇醫生

都唔明點解社工要我咁趕去見一見家庭醫生, 約左呢日一朝早九點半. 偏偏囝囝前晚瞓到半夜三點幾起身, 扭計扭到五點幾我地先可以瞓, 不過諗返扭計既原因可能又係同肚餓有關.

 

較左朝早八點起身, 响極度不願起床下, 响八點三就起身. 搗下搗下好快就夠鐘出門口, 好在今日表姐黎接送我地, 原來出面落"狗屎", 真係狼狽加狼狽.

 

去到見醫生, 醫生睇左醫院比佢既Report, 話BB好好, 重話有度唔知有99點幾%既野, 應該係個聰明B(Oh~ 兩個笨爸媽, 負負得正?), 希望真係好似醫生咁講啦.

 

跟住就問我有乜問題, 一時間都唔知有乜問題... 話左比醫生知阿B食人奶食到我損左, 佢就寫左支藥膏比我. 另外唔知係咪今日太趕啦, 出出入入令到下面傷口好似好痛咁, 比醫生檢查. 嗚~~ 佢話個接生既醫生剪得我好怪, 可能會比平時難好返, 同埋而家有少少紅腫. My God~~~ 唔好玩我啦. 醫生再開多支藥膏比我, 叫我同搽上面既藥膏分開用. 佢問係咪個位專科醫生幫我接, 我話個日佢無當值. 跟住就問我咁之後個位醫生有無再檢查返, 我話佢只係黎見一見我. 醫生聽到後好愕然, 我心諗你都覺得佢好無責任感吧... 所謂專科...當時真係想同佢講,, 呢位醫生係你介紹話好既, 但我真係覺得麻麻囉.

 

睇完醫生都無乜心機, 本來表姐話同媽咪去食粥. 我唔太想去, 跟住媽咪都唔去了, 真係唔好意思... 返左屋企清潔下, 搽好藥膏再瞓返夠本.



瞓醒覺眼望望^^

乖

過左幾日都好似未有奶比阿B飲, 佢地話睇到我個胸都未有谷奶既跡象, 終於忍唔住, 開左响診所拎既Sample液體奶比阿B飲.

可能係終於飽肚仔既關係, 佢成日都瞓得好好. 下午表姐搵左媽咪出去唐人街食野&買野, 去左幾個鐘. 阿B就瞓足咁多個鐘, 原來飽肚既阿B係好好湊既.


 

出左世啦^^

BB終於响5月29日既半夜時間出左世啦. 因為而家被禁用電腦&睇書, 所以遲D先補返自己既生B過程&BB近況啦^O^.



附照片一張~~

紅

半夜三點幾起身, 諗住去廁所. 點知見紅啦, 好似每月黎咁. 叫醒左媽咪&老公, 再打比醫生. 點知醫生問血量多唔多, 佢話睇多幾個鐘, 如果多就十點去醫院佢會幫我檢查. 唯有再瞓返啦, 真係唔好意思啦~~~

有D緊張之下, 瞓著幾次又醒左幾次, 矇矇矓矓間又有少少想開大既感覺. 去左幾次廁所, 用力時先有血. 到左九點半打比醫生, 佢話如果無乜血又無作動, 就照舊到下個星期再去見佢.

 

唔知阿B係準時B還是鍾意玩遲到既B呢, 我就希望佢呢兩日出現啦

2013年11月15日: 睇返呢段時間既Blog, 識左Lulu呢個Blog友, 令我感覺到好多溫暖. 所以同佢既話都Copy埋過黎, 第時再回憶下^^.

尾聲

醫生放大假, 上次同埋今次都係另一位醫生見我. 呢位醫生係外國人, 我覺得佢真係細心啲. 量血壓真係拎個鐘出黎計時, 按完肚再用超聲波黎確認嬰兒位置, 重會講埋比我聽而家照緊係BB乜部位, 又會講返上次見我時我提出既問題.

而家開始每個星期見醫生一次, 唔再係隔兩個星期. 而家開始洗衫, 抹BB車...希望阿B唔好太快出黎呀, 等我執好晒啲野先啦~~

淚

嘩~~~ 係咪一路陀住B一路都會受荷爾蒙影響而情緒激動, 唔係話陀到咁上下會好D咩? 做乜我而家先發生....

一路坐响度打機, 一路諗野. 突然間淚腺不受控制, 係咁流眼淚... 唔通有...

 

唔好影響到阿B... 唔好影響到阿B...

 

嘩~~~ 出面居然落左小小雹... 可能被溫哥華D變態天氣影響心情?

發夢

前一日聽903既新節目, 入面主持人講起好耐以前有套外國既電視恐怖劇集, 其中有一集講有一家人既阿"女麻"已經死左, 但有一晚佢居然响墳場走返返屋企同佢D屋企人繼續一齊生活...

 

昨晚居然發夢, 夢入面好似係下午, 我同阿姨講話我要瞓一陣, 跟住居然見到兔仔, 佢好似以前咁跳上黎我度, 伏左响我右手邊等我好似以前咁摸佢. 然後我, 阿姨&細佬就响度研究, 兔仔唔係"咩"左啦咩? 點解會咁既? 然後我就抱起佢, 同佢講, 你已經"咩"左啦喎, 點解你重响度既? 然後兔仔突然就變左一隻兔公仔咁既形狀. 然後我就開始喊, 同佢講: 我重好掛住你, 唔會忘記你, 我重記得你耳仔尖好似絲絨咁柔軟既感覺. 跟住再想喊時就醒左啦...

 

唔通係因為我聽左呢個節目既緣故???



兔仔~ ~無論過左幾多歲月, 我心入面一定會有你存在既位置~~ 你而家响彩虹橋一定要生活得開開心心呀!

見專科醫生

今日比星期一更早, 約左八點十五分見專科醫生. 今日天氣非常晴朗, 陽光沛照.

 

到左醫院, 接待處既職員叫我先驗尿, 好在順便磅埋重. 跟住佢就問埋我幾重, 同星期一一樣. 跟住坐低等叫名, 好快就叫我去另一邊等醫生.

 

醫生先睇我既病歷, 再問我屋企有無人有糖尿&高血壓, 然後就再睇我呢日半既紀錄, 佢居然話Good. 然後就再幫我量血壓, 聽呼吸&度下BB大小, 佢都係個句: Good. 然後就話兩個星期後再見佢.

 

之後又見護士, 佢話而家唔駛每日驗血. 今日驗左四次, 第二日唔駛, 第三日驗三次, 第四日唔駛, 第五日又驗返四次, 就係咁循環...跟住就叫我响出面再等.

 

今次我諗又係見營養師, 佢再睇返我既紀錄&詳細咁問我食過D乜, 好在我有寫低. 佢再幫我改一改個Plan, 睡前小食可以加D果仁, 令我可以再耐飽D時間. 然後就每一餐之後都要出去散步.

 

再見多一位係物理治療師, 佢先再問我知唔知糖尿病係乜, 我大約講左之後佢都滿意. 佢再解釋我地既血糖水平應該全部都平均, 唔好一時高一時低. 然後就再睇我既資料, 佢話我應該每日用餐既時間要一樣, 同埋步行如果行得快就可以十五分鐘, 再話比我聽去大大時用乜姿勢可以幫助更順, 再同我講放鬆心情, 因為情緒都會有影響到血糖高低. 佢好有心機講解, 問我有無問題, 無的話就可以响接待處預約下次見醫生時間.

 

下次見醫生時間係四月六號, 希望一切都係好以今日既陽光咁Good啦!

飲食計劃第一日

九點半起身預備早餐, 等到九點五十分開始驗尿&驗血之後到十點正食早餐. 早餐過後做左廿分鐘家務, 等夠一個鐘就再驗多次血. 哎~~ 唔合格!

食完早餐之後兩小時有morning snack, 之後再過兩小時就到食午餐, 今次只需响餐前驗血. 又係做左廿分鐘家務响一小時後驗血. 嗚~~ 都係比標準高少左!

兩小時後再黎個Snack, 然後就再响兩個半小時後食晚餐. 食晚餐前又黎驗血&驗尿, 六點半食完飯就出左去散步, 走左去圖書館, 點知行多左廿分鐘. 返到屋企剛過左五分鐘, 即時驗血. 嘩~~~ 今次合格啦!

見營養師

今日十點去醫院見營養師, 但一早就落住雨, 又無遮, 行去Skytrain站搭巴士, 但未到已經濕晒, 車程十五分鐘, 再要行一段路先到, 夠晒運動.

因為落住雨又無遮, 求其入左一幢Building, 但都搵唔到reception. 咁啱見到有人就問, 原來呢層係二樓黎既, 跟住就帶左我去返正門, 真係好人.

接待處既人睇完我既Care Card後就另外再整左張藍色卡出黎, 之後每次返黎醫院時都要拎出黎.

等左一陣就係Nurse出黎教我每次黎到醫院時自己首先要做D乜, 就係自行磅重&驗尿.

再等左陣就係見營養師, 問完我有無乜病歷後就指導我食D乜, 食既時間&運動時間. 然後再見返頭先既Nurse, 佢再大約講比我聽糖尿病係D乜, 同埋比左部機我&教我點用, 要响每餐正餐食前5-10分鐘驗血, 食完之後就立即要步行廿分鐘, 由進食時間開始起計1個鐘再驗一次. 天呀~~ 一日要拮自己手成七次咁多...

 

之後就走得, 等埋蝦子餅返到屋企先去Superstore買所需用品. 買左成百蚊, 唔怪得人地話係富貴病啦. 唉~~

 

護士叫由晚餐開始紀錄, 食完飯過左一個鐘驗. 嘩! 超過標準呀. 會唔會係今餐豐富得滯呢... 再睇下明天點.

一日假期

蝦子餅難得今日有一日假期. 不過今日都有好多野要做, 去銀行, 去報稅, 去剪髮... 中間有D空閒時間, 兜左去Stanley Park.

難得一日可以周圍走, 可惜天陰陰.

遙遠既獅門橋



返黎响上次食雪榚既對出有兩棵櫻花樹已經開始開花



又係適合周圍走既季節啦



再去Robson街買D野, 終於比我見到呢架車啦, 專登行過黎影下.



夠晒特式既車, 下次再影清楚少少先.



車前面重要整個小噴泉.

第二次血糖測試

八點就去到化驗室, 原來己經有幾多人等緊, 好在醫生祕書昨天幫我Book左, 唔駛等好耐就叫我入去.

今次一開始先抽我一次血, 用返昨天個抽血位, 都有少少痛. 然後就飲糖水, 今次係一種無顏色既, 我諗係純味吧, 仍然覺得都唔太難飲, 可能因為我係嗜甜怪啦, 嘻嘻. 然後就等一個鐘, 職員就問我有無覺得唔舒服. 我話無乜感覺, 佢話通常無乜感覺應該都無乜問題既, 希望啦. 今次就响右邊手抽血, 然後再等一個鐘. 好快又一個鐘啦, 今次又用返昨天個抽血位, 即係前前後後抽左三次啦, 都係痛一痛咁, 抽完就鬆人啦.

希望今次個測試無問題啦, 唔該~~~~

為左令到張乘車票物盡其用, 發揮師奶本色. 去左Richmond買香&文具, 然後再趕返屋企, 原來係唔夠時間的.

情人節

今日係星期一, 係返工返學既平常日子. 唯有等夜晚先去慶祝啦. 下午既時候响屋企整左蔬菜沙律等老公返黎, 之後再出去食甜品.

又係去左Death by Chocolate, 今次選既蛋榚叫Trouble Chocolate Mousse Cake. 以我黎講唔算太漏, 所以唔太夠喉.

就係咁蝦子餅再帶我去Marble Slab Creamery食雪榚, 叫左Cookie Dough Drizzle. 係Birthday Cake味雪榚mix Cookie Dough, Oreo Cookies & Fudge. 加埋又香又脆既Waffle, 勁滿足呀, 重飽到第二日tim~~~

第四次見醫生

上個月約左今日朝早十點見醫生, 點知早幾日打黎話醫生要幫人做手術所以要轉時間, 轉去八點廿五分. 但星期三打黎話醫院將個手術轉左去早D既時間, 變左時間又轉返去十點廿分.

 

唔知係有人手多多較到個鬧鐘定係個鬧鐘自己傻左, 居然快左成粒鐘. 我地重以為自己遲左起身, 變左去到目的地重有大把時間. 諗住去老麥嘆返個早餐, 點知見到好多人排隊. 原來呢兩日有免費包派, 拎左之後就去第二度買杯熱朱古力慢慢坐. 但原來個包一D都唔好食, 又乾又淡. 唔怪得免費派啦~~

 

坐到差唔多夠鐘就上醫生度, 可能我地早左, 所以一磅完重就即刻入房等醫生啦. 等左陣醫生入黎, 然後叫我訓上張椅度, 用超聲波黎睇BB. 唉! 求其到呢.... 個畫面只係顯示左BB一兩次(每次一秒都無)佢就話OK無問題, 我同佢講話我老公兩次超聲波都無機會去睇, 但佢都無慢D (唉! 算啦~). 跟住就幫我量血壓, 佢D學生都會摺返高我既衫袖, 但佢就隔住件衫黎量既(在佢黎講可能唔係問題, 但我又再次見到佢係幾咁求其). 然後我地就同佢講話有少少傷風. 佢幫我聽下背, 話我肺有少少發炎, 會開D抗生素我食. 再請醫生介紹埋皮膚專科&物理治療比我, 跟住就再約下次見面時間.

醫生祕書幫我地約左皮膚專科, 最快都要三月先睇得. 物理治療原來係响隔離, 但要自己比錢>.< $65一次呀, 好貴. 希望去一次就OK啦. 因為條尾龍骨近屁屁附近D骨成日都好易就好唔舒服, 可能係正常既?

响樓下London Drugs配藥, 再行左陣Michaels就返屋企啦.

早幾日行Safeway時見到呢D盆栽, 名字叫Campanula. 成盆都係紫色花仔, 好可愛. 放响屋企真係搶鏡, 可惜價錢要成七蚊加幣一盆, 如果開完花都可以Keep得住生的話就無問題, 但無呢個信心呢, 所以用手機影低佢算啦.

英文名

星期日表姐比左一堆英文名我地選, 我同表妹都覺得第一&二個名都幾好. 而第一個名就更啱心水, 係Jaden. 第二個就Caden, 而因為Caden第一個發音係個"崎"音, 好似唔太好. 而且第一個名既意思都幾啱老公心水, 所以諗住如果再無其他覺得好聽既就會選擇呢個.

睇到娛樂新聞, 話李嘉欣個仔叫Jayden. Oh~~~有無咁啱呀. 我地選既英文名係Jaden喎. 讀音上係一樣, Check返意思, 都係咁上下喎., 表姐真係識搵呀.

而家重未決定選唔選呢個名好, 但老公就話咁呢個真係好名一於選呢個啦. 但我就會諗...咁我咪即係等於起自己個仔既名叫李嘉誠???... 點好呢...

嘩! 我要做媽咪啦~~

我有左BB啦~~~ 有時覺得好難想像自己居然將會做媽咪...

其實係差唔多第一時間知道, 因為我一向都好準時. 咁遲先寫Blog, 係因為第一個月時我又被D皮膚搗到瞓唔好座唔定, 食左之前個個唔聽人講野既醫生既藥, 擔心唔知究竟會唔會影響到BB. 而經過兩次既驗血, 兩次既超聲波&醫生話D藥係無問題, 總算放心了. 而之前部電腦又突然Short左, 要重新再裝過個Windows&Software, 用Scanner/ Printer又好麻煩. 再加上而家個人好懶, 所以就拖到而家先記錄返自己既野. 點都要寫返落Blog等第時自己可以睇返今日既心情啦.

預產期係2011年5月28日, 同事話5月出世既BB都好聰明, 咁唔知阿B可唔可以响5月份出世啦.

希望BB乖乖地健健康康準時出世, 皮膚要似爸爸咁白滑, 唔好似媽咪咁成日"身痕"呀...

第三次見醫生

今次約左下午兩點睇醫生, 蝦子餅陪唔到我去, 但就大家一齊出門口. 因為我重有兩個鐘時間, 所以首先去左Central Library, 去到睇左一陣書. 然後就再轉另一條Line既SkyTrain.

 

去到重有時間, 又去Michaels行左一陣. 見到好多減價貨都比人清左倉, 尤其D貼紙. 有時見到個減到好平既價錢, 再睇返個Barcode, 就知道原來係放錯貨(因為無可能咁靚既野會減到咁平嘛). 所以又係得個睇字, 然後就行返去醫生度啦.

 

去到又係第一時間比個樽仔你, 然後就幫你磅重, 座低再等叫名入去睇醫生. 今次又係有個女仔先走入黎, 原來佢地都係醫生既學生黎. 不過今次呢個女仔無咁淡定, 同我量血壓時好次重有少少手震震, 可能係咁所以醫生好快就入左黎.  

 

唔知係咪因為呢間房有超聲波既設備(還是今日我黎睇醫生係需要用超聲波呢?), 醫生居然開左超聲波黎睇BB喎(真可惜蝦子餅今日又唔可以陪我>.<), 佢睇一睇就即刻問我想唔想知佢係男定女呀? 我當然答想啦~~ 佢即刻就答係囡囡黎的. 然後我就話比醫生聽, 剛剛呢個星期一你安排左我去照超聲波, 但個邊D人話係男仔黎喎. 然後醫生再睇清楚, 佢先話係男仔黎, 我就問佢點睇到架. 佢就指左Mon上面既部位比我睇, 又幾似喎. 但究竟係咪真架??? 其實男定女都無所謂, 但唔好一陣又話佢係男仔一陣又話佢係女仔囉. 而家都唔知買唔買定D野好, 而且都要諗定改名架嘛.

 

之後醫生就話BB無問題, 然後今日我終於可以問醫生問題啦. 問佢我要唔要去醫院登記先架, 佢話佢會幫我登記. 然後就係便便硬既問題, 佢話咁就停左食維他命啦. 牛奶就一日要飲夠兩杯, 再問返究竟上幾次去驗血係咪都無問題呢, 佢Check返電腦, 話一切都OK. 然後就係瞓覺既問題, 佢話右側&左側都OK, 但唔好仰睡, 因為會傷到條腰骨. 好囉~~ 終於問完, 咁多個星期既疑問終於知道了. 然後再約下個月既Booking, 今次終於約到朝早啦, 唔知到時可唔可以比蝦子餅有機會睇到BB呢.

第二次照超聲波

今晚七點去照第二次超聲波, 睇BB既結構. 原本約左表妹同我一齊去, 但佢發燒, 所以就變左姑姐同我一齊去. 上次問過其實唔駛真係飲足四杯水, 飲兩杯都得. 所以今次去輕鬆好多.

 

今日雖然比較多人, 但都好快就到我. 今次幫我照超聲波既女士叫左姑姐响房出面等, 然後就同上次差唔多, 唔駛除鞋就咁訓响張椅度, 再打開個肚皮等佢, 然後佢就吱D暖笠笠既Gel响肚上面,. 佢就開始睇阿B啦.

好在呢位女士講既英文比上次個一位清楚, 我一路都明佢講緊D乜, 其實都係話而家Check緊D乜, 而最多就係OK, Good. 哈哈哈~~~ 今日Check到既心跳係155下, 然後佢話阿B而家個姿勢遮住左臉仔, 好難睇到. 佢再問我想唔想知佢係男定女, 我梗係話想啦, 謎底終於响今日掀曉啦.

 

今日終於都知道阿B係男定女啦, 原來係男仔黎. 跟住佢就話叫我去解放一下, 再响房等一等佢. 等左一陣, 佢叫埋姑姐入黎, 再照多次, 睇下阿B有無轉身, 好在有啦. 終於照到佢既臉, 都係無問題. 然後佢就話比我地聽Mon上面既影像係阿B既邊部份, 但今次無上次睇得咁清楚了, 除左佢腳板底最清楚, 我地都睇到一嚿雲.

就响我重傻下傻下之下, 佢比左幾張圖比我地留念, 然後就話我地可以走得啦, 佢重閃得好快Tim. 應該問下佢D圖係乜部位, 而家拎住真係眼光光呢.

姑姐問我蝦子餅鍾意仔定女, 我話梗係仔啦. 佢未知阿B係男定女時已經叫定佢囝囝呀囝囝呀咁, 話就話仔女都鍾意, 但行動已經証明你想點啦. 哈哈~~ 然後姑姐就提議一陣返到去同老公講話係女睇下佢有乜反應, 一返到屋企就即刻問啦. 我望住佢, 佢再問我, 然後我就話係女呀. 佢就話女就女啦, 重乜咁驚. 我心諗, 講大話梗係無咁自然架啦. 嘻嘻~~ 然後佢就問係咪健康正常呀, 咁就無問題了. 又話聽過人講如果第一個BB係女的話會好D咁. 跟住佢就開始好努力咁諗名啦.

 

差唔多訓覺既時候, 蝦子餅想打長途電話向父母報告最新消息, 我先話比佢聽真相啦. 跟住佢又話媽咪鍾意女喎~~ 咁你想點先? 老細... 哈哈~~ 真係唔話佢傻佬都唔得. 不過因為聽得人講話照既時候同生既時候都唔一樣, 所以我話可能唔準架. 佢就話都係報左先啦.

 

今次D圖無上次咁清楚, 好抽象呀~~

呢幅更加睇唔到係乜

呢張好少少, 右邊應該係阿B既頭吧