見專科醫生

今日比星期一更早, 約左八點十五分見專科醫生. 今日天氣非常晴朗, 陽光沛照.

 

到左醫院, 接待處既職員叫我先驗尿, 好在順便磅埋重. 跟住佢就問埋我幾重, 同星期一一樣. 跟住坐低等叫名, 好快就叫我去另一邊等醫生.

 

醫生先睇我既病歷, 再問我屋企有無人有糖尿&高血壓, 然後就再睇我呢日半既紀錄, 佢居然話Good. 然後就再幫我量血壓, 聽呼吸&度下BB大小, 佢都係個句: Good. 然後就話兩個星期後再見佢.

 

之後又見護士, 佢話而家唔駛每日驗血. 今日驗左四次, 第二日唔駛, 第三日驗三次, 第四日唔駛, 第五日又驗返四次, 就係咁循環...跟住就叫我响出面再等.

 

今次我諗又係見營養師, 佢再睇返我既紀錄&詳細咁問我食過D乜, 好在我有寫低. 佢再幫我改一改個Plan, 睡前小食可以加D果仁, 令我可以再耐飽D時間. 然後就每一餐之後都要出去散步.

 

再見多一位係物理治療師, 佢先再問我知唔知糖尿病係乜, 我大約講左之後佢都滿意. 佢再解釋我地既血糖水平應該全部都平均, 唔好一時高一時低. 然後就再睇我既資料, 佢話我應該每日用餐既時間要一樣, 同埋步行如果行得快就可以十五分鐘, 再話比我聽去大大時用乜姿勢可以幫助更順, 再同我講放鬆心情, 因為情緒都會有影響到血糖高低. 佢好有心機講解, 問我有無問題, 無的話就可以响接待處預約下次見醫生時間.

 

下次見醫生時間係四月六號, 希望一切都係好以今日既陽光咁Good啦!